दूरबिन नेपाल, न्यूह्याम्पसर
अमेरिकाको न्यूह्याम्पसर राज्यमा स्थापित एकमात्र नेपालीभाषीहरुको छाता संगठन न्यूह्यामसर नेपाली समाजले आयोजना गरेको खुला टेनिस प्रतियोगिता २०१९ (पुरुष सिंगल्स) को उपाधि दिनेश गुरुङले जितेका छन् । आइतबार सम्पन्न फाइनल खेलमा मनिष हुमागाईँलाई ६–४, ६–४ को सोझो सेटमा पराजित गर्दै गुरुङले पूरुष एकल तर्फको उपाधि हासिल गरेका हुन् । त्यस्तै प्रतियोगिताको डबल्स संस्करणमा हर्क गुरुङ र रिकाश गुरुङको जोडी बिजयी भएको छ । उनीहरुले फाइनलमा किरण हुमागाईँ र मनिष हुमागाईँको जोडीलाई ६–३, ४–६ र ६–४ को अन्तरमा पारजित गरेका हुन् । एक सातासम्म चलेको प्रतियोगिको सिंगल्स तर्फ १७ जना र डबल्स तर्फ नौ जोडी खेलाडीले भाग लिएका थिए । राज्यको म्याम्चेष्टर स्थित टेनिस कोर्टमा सम्पन्न प्रतियोगिताका विजयी एवं सहभागी खेलाडीलाई फाइनल खेलपछि आयोजित समारोहमा न्यूह्याम्पसर नेपाली समाजका अध्यक्ष सोम गुरुङले ट्रफी एवं प्रमाणपत्र वितरण गरे । यसैगरी प्रतियोगिता अवधिभर रेफ्रीको भूमिका निर्वाह गर्ने हेमेन्द्रध्वज खड्का, वीर शाह, रविन थापा, गोविन्द गुरुङलाई प्रमाणपत्र एवं मायाको चिनो प्रदान गरिएको थियो ।
प्रमाणपत्र वितरण कार्यक्रममा अध्यक्ष गुरुङले खेल मार्फत राज्यमा बसोबास गर्ने नेपालीभाषीहरुमा भाइचारा अभिबृद्धि गर्ने समाजको अभियानबारे चर्चा गरेका थिए । ‘हामीले हरेक बर्ष फुटबल, टेनिस लगायतका खेलकुद प्रतियोगिता आयोजना गरिरहेका छौँ, उनले भने ‘यसले न्यूह्याम्पसर मात्र नभइ अन्य छिमेकी राज्यमा बसोबास गर्ने नेपालीभाषीहरुबीच पनि आत्मियता र भाइचारा बढाइ रहेको अनुभव गरेका छौँ ।’ टेनिस प्रतियोगितामा बर्षेनी बढ्दो सहभागिताले नेपालीहरुले आफ्नो समुदायमा मात्र नभइ अरु खुला प्रतिस्पर्धामा पनि छिटै आफ्नो पहिचान स्थापित गर्ने विश्वास आफुले लिएको उनको भनाइ थियो ।
प्रतियोगितामा राज्यका विभिन्न ठाउँहरुमा बसोबास गर्ने विभिन्न उमेर समूहका पुरुषहरुको सहभागिता रहेको थियो । ‘सहभागीहरुको संख्या बर्षेनी बढ्दो छ’ विगत केही बर्षदेखि खेलकुद प्रतियोगिताको संयोजन गर्दै आएका न्यूह्यामसर नेपाली समाजका महासचिव माधव गुरुङले भने ‘नयाँ पिडीका भाइबहिनीहरुले पनि टेनिस खेलप्रति उत्साहजन सहभागिता जनाउँदै आएका छन् ।’
प्रतिक्रिया लेख्नुहोस्:-