२०१९ मा न्युयोर्कका १० प्रहरीले गरे आत्महत्या, घृणाजन्य अपराधमापनि बृद्धि

बद्रि गौतम, दूरबिन नेपाल, न्युयोर्क
सन २०१९ मा न्युयोर्कमा १० जना प्रहरीले आत्महत्या गरेका छन । आत्महत्या गर्ने प्रहरीमा मानसिक समस्या भएको अनुमान गरिएपनि यकिन कारण भने पत्ता लाग्न सकेको छैन । आत्महत्या गर्ने प्रहरीहरु पारिवारिक तथा आफ्नो पेशाका कारण चरम निराशामा पुगेको अनुमान गरिएको छ । न्युयोर्क प्रहरीले आफ्ना कर्मचारीहरुको लागि मानसिक तनाव कम गर्ने अभियान चलाइरहेको छ । यद्यपि सो प्रभावकारी हुन सकेको छैन ।

आफ्नै सहकर्मीको गोलीबाट दुई प्रहरीको मृत्यु
यसैगरि सन २०१९ मा आफ्नै सहकर्मीको गोली लागेर दुईजना प्रहरीको ज्यान गएको छ भने अर्का एकजना प्रहरी अधिकारी घाइते भएका थिए । एक पहरीले अर्का सादा पोशाकमा रहेका प्रहरीलाई नचिन्दा यस्ता घटनाहरु हुने गरेको अनुमानका आधारमा आगामी दिनामा यस्ता घटना कम गर्न विशेष तालिमको व्यवस्थागर्न लागिएको न्युयोर्क प्रहरीले जनाएको छ ।

पान्टोला र गार्नर हत्या

यसैबर्ष प्रहरी अधिकारी डेनियल पान्टोलाले इरिक गार्नरको हत्या गरेको मुद्धाले न्युयोर्कमा निकै चर्चा पायो । सन २०१४ मा स्टेटन आइल्याण्डका इरिक गार्नरको प्रहरी अधिकारी डेनियल पान्टोलाको लापरवाहीले हत्या भएको थियो । पान्टोलाले मृतक गार्नरलाई सास नै फेर्न नमिल्ने गरी समातेका कारण मृत्यु भएको परिवारको आरोप छ । यसै घटनाका सम्बन्धमा न्युयोर्कका प्रहरी प्रमुख ओ नेइलले पान्टोलालाई बर्खास्त गरे ।

एक होमलेस (घर विहिन) ले चार जना होमलेसको हत्या गरे
यसै बर्ष न्युयोर्कमा एक होमलेसले चार जनाको हत्या गरेको घटनापनि निकै चर्चित भयो । फलामको पाइपले बाटामा सुतीरहेका होमलेसमाथी अन्धाधुृन्द प्रहार गर्दा चार जनाको ज्यान गएको थियो । सो घटना चाइना टाउनमा भएको थियो । आक्रमणकारीलाई प्रहरीले पक्राउ तत्कालै गरेको थियो । न्युजर्सीको जर्सी सीटीमा रहेको यहुदिहरुको पसलमा ६ जनाको हत्या गरिएको घटनाले पनि सबैको ध्यान तानेको थियो । त्यसैगरि १८ बर्षीया युवतीको मर्निङ साइड पार्कमा १३ बर्षीयले हत्या गरेको घटनापनि सनसनीपुर्ण बन्यो ।
केहि समय अघि न्युयोर्क प्रहरीका कमीसनर डर्मोट शीयाले न्युयोर्कमा हत्याका घटनामा ८ दशमलव ७ प्रतिशतले बृद्धि भएको रिपोर्ट सार्वजनिक गरेका थिए । । बर्ष १९ को नोभेम्बर सम्ममा दुइ सय ९९ जनाको हत्या भइसकेको देखिएको थियो । जुन अघिल्लो बर्षको भन्दा धेरै हो । यसैगरी यो बर्ष १२ हजार एक सय डकैतीका घटना भएका छन जुन हघिल्लो बर्षको तुलनामा धेरै हो । तर बलात्कार र चोरी लगायतका घटनामा कमी आएको प्रहरीले जनाएको छ । अघिल्लो बर्ष भन्दा यो बर्ष गाडी चोरी, बलात्कार लगायतका घटनामा तीन दशमलव प्रतिशतले कमी आएको छ ।

फोटो साभारः एनवाइपीडी