दूरबिन नेपाल, न्युयोर्क
न्युयोर्कका गभर्नर एण्ड्र्यु कुमोले संघीय सरकारको अदुरदर्शिताका कारण अमेरिका कोरोनाको महामारीबाट मुक्त हुन नसकेको आरोप लगाएका छन । गभर्नर कुमोले आफ्नो नियमित ब्रिफिङका क्रममा ह्वाइट हाउसले कोरोनाको महामारीकै विचमा विभिन्न राज्यहरुलाई लक डाउन खोल्न दवाव दिएको गुनासो गरेका छन । राष्ट्रपति ट्रम्पको दवावले लक डाउनको अवस्थामा रहेका कतिपय राज्यहरु खोलिएका कारण अहिले कोरोना महामारी झन फैलिएको कुमोको तर्क छ । मुलुकको अर्थतन्त्र महत्वपुर्ण भएपनि जनताको ज्यान भन्दा मुल्यवान नभएको र कोरोना नियन्त्रण भन्दा राज्य खोल्न हतारिएका कारण अर्थतन्त्रपनि झन खतरामा पर्न थालेको कुमोले आफ्नो नियमित प्रेस ब्रिफिङका क्रममा बताए ।
कुमोले कोरोना भाइरसलाई चिनीयाँ भाइरस भन्दै टार्न खोजिएको तर अमेरिकामा कोरोना भाइसर युरोपबाट आउनेहरुबाट फैलिएको दावी गरे । “राष्ट्रपति ट्रम्पले चीन तर्फको उडानमा प्रतिबन्ध लगाइरहेका बेला युरोपमा कोरोना महामारी फैलिसकेको र न्युयोर्क, न्यु जर्सी तथा अमेरिकाका विभिन्न विमानस्थलमा युरोपबाट लाखौ मानिस भित्रिइरहेका थिए” कुमोले भने । संघीय सरकारप्रति निकै आक्रोशित भएका कुमोले न्युयोर्कले अनुशासन कायम गरेकै कारण कोरोना नियन्त्रणमा आइरहेको बताए । संघीय सरकारले मुलुकभरी जम्मा ४१ स्थानमा कोरोना परिक्षण केन्द्र स्थापना गरेको आरोप लगाउदै कुमोले न्युयोर्क राज्यले सात सय ५० स्थानमा कोरोना परिक्षणको व्यवस्था मिलाएको जिकिर गरे । कुमोले राष्ट्रपति ट्रम्पलाई मास्क अनिवार्य लगाउनुपर्ने कार्यकारी आदेश जारी गर्न र आफुले पनि मास्क लगाउन सुझाव दिए । यतिबेला अमेरिकाका ३२ राज्यमा कोरोना संक्रमितको संख्यामा बृद्धि भइरहेको छ भने न्युयोर्क लगायत न्यु जर्सी कनेक्टीकट जस्ता राज्यमा कोरोना भाइरसको संक्रमणमा कमी आइरहेको छ ।
न्युयोर्कमा कोरोना नियन्त्रण तर्फ
अमेरिकाका अन्य राज्यहरु कारोना महामारीका कारण आक्रान्त बनिरहेका बेला न्युयोर्कमा भने नियन्त्रण उन्मुख देखिएको छ । गभर्नर कुमोले दिएको जानकारी अनुसार शनिवार न्युयोर्कमा मृतकको संख्या पाँच मात्र रहेको छ । कुनै बेला दैनि ८ सय मानिसको मृत्यु भएको न्युयोर्कमा पछिल्लो अवस्थाले निकै सुधारोन्मुख संकेत गरेको छ । न्युयोर्कमा आइतबार कोरोना भाइरसका कारण ज्यान गुमाउनेको संख्या सात रहेको छ । त्यसैगरी अस्पतालमा भर्ना हुनेको संख्यामा पनि गिरावट आइरहेको छ भने आइसीयु र भेण्टिलेटरमा जाने विरामीको संख्यामा पनि कमी आइरहेको छ । कुनै बेला दैनिक दश हजार सम्म संक्रमित पुगेको न्युयोर्कमा यतिबेला भने दैनिक ५ सयको हाराहारीमा संक्रमित रहेका छन । गभर्नर कुमोले विस्तारै चरणबद्ध रुपमा न्युयोर्क खुला हुदै जाने जानकारीपनि दिए । यतिबेला न्युयोर्कका केही स्थानहरु तेस्रो चरणमा खुली रहेका छन भने यहि साता देखि चौथो चरणमा खुल्ला गर्ने जनाइएको छ । न्युयोर्कको घना आवादी रहेको न्युयोर्क सीटीको हकमा पुरा खुल्न अझै केही समय लाग्न सक्ने बताइएको छ ।
सोमबारको प्रेस ब्रिफीङमा कुमोले न्युयोर्क राज्यभरी फायर वक्र्स अवैध र खतरनाक भएकोले त्यसको नियन्त्रणमा स्थानीय निकाय र प्रहरीलाई आदेश दिएका छन ।
प्रतिक्रिया लेख्नुहोस्:-