ट्रम्प फेरि विवादमा

 राम कुमार सुबेदी

अमेरिकी राष्ट्रपति ट्रम्पले देशका लागि ज्यानको बलिदान गर्ने सेनाहरूलाई लुजर र सकर जस्ता भद्धा र अभद्र शब्दद्वारा र यहाँ उल्लेख गर्न नै नसकिने अश्लील वाक्यमा बिगतको पेरिस भ्रमणको बेलामा गाली गरेका कुरा दि एट्लान्टिस न्यूजले समाचार प्रकाशित गरेको छ l उनले यस्ता हरुवा र चुसुवा मरेका सेनाहरुलाई सम्मान दिन किन जानु भनेर अस्वीकार गरेको कुरा समेत उल्लेख गरेका छन् l त्यही बेला उनले अति तल्लो स्तरमा असभ्य र अश्लील वाक्य समेत प्रयोग गरेका थिए l त्यही न्यूजलाई आधार मानेर ट्रम्प समर्थक फक्स न्यूज, र अरू संचार माध्यम जस्तै वासिङ्टन पोस्ट, न्यूयोर्क टाईम्स, एसोसियेट् प्रेसले समेत आफ्नो समाचारमा यो ताजा खवरलाई समेटेका छन् l

ट्रम्पले संचार माध्यममा आएको यो समाचारलाई अस्वीकार र खारेज गरेका छन् र बिगतमा झै यो पनि अर्को होक्स भनेका छन् l एक्सक्लुसिभ र ब्रेकिँग न्यूजमा आएको ट्रम्पको शहीद भएका सेनामाथि गरिएको अपमानजनक टिप्पणीप्रति डेमोक्र्याट पार्टीबाट राष्ट्रपतिमा उम्मेद्बारी दिएका जो बाईडेन, सेनाका पूर्व उच्च पदाधिकारीहरु, पूर्व रक्षा मन्त्री(डिफेन्स सेक्रेटेरी) हरू, भेट्रान र बलिदानी गरेका सेनाहरुको सम्मानमा खोलेका सँस्था आदिले तीखो आलोचना सहितको प्रतिकृया व्यक्त गरेका छन् l चुनाबको पूर्वसन्ध्यामा आएको राष्ट्रपति ट्रम्पको यो देश र देशबासीको लागि लडेर शहीद भएका सेनाहरुप्रति बिषबमन चुनावको लागि घाटा र घातक हुने पर्यवेक्षकहरु अनुमान गर्छन् किनकी उनलाई सेना र प्रहरीबाट साथ रहँदै आएकोमा यस भनाईले नकरात्मक प्रभाव पार्ने देखिन्छ l

एट्लान्टिसको अनुसार उनले बिगतमा पेरिस भ्रमण गर्दा मुलुक र मुलुकबासीको लागि लडेरै निधन भएका समाधी स्थलमा “हरुवाहरुले भरिएका त्यो भीडलाई सम्मान दिन जान्नँ” भनी गएका थिएनन् l उनको पेरिस भ्रमणको बेलामा पेरिसमा पानी परिरहेको थियो र पानीले आफ्नो कपाल बिग्रिने चिन्ताले स्मारक स्थल गएनन् भनेर एट्लान्टिसले थप्छ l अर्को उनले मारिएका सेनाहरुलाई सम्मान दिन उचित, औचित्य र महत्वपूर्ण देखेनन् l पेरिसमा देशका लागि ज्यानको आहुति दिने लगभग अठार सय सेनाहरुको समाधी रहेको छ l यी सेनाहरुले आफ्नो ज्यानको बाजी लगाएर प्रथम विश्वयुद्धमा जर्मन सेनालाई पेरिस आउनबाट रोकेका थिए l

जो बाईडेनले यो समाचारमा पढेपछि ट्रम्पलाई “राष्ट्रपतिका र कमान्डर ईन चीफका लागि योग्य, उपयुक्त र फिट छैनन् भन्दै ईराक युद्धमा लड्ने मेरा छोरा लगायत बिदेशमा देशका लागि लड्ने सपूत र जीवित भेट्रानहरु सबै लुजर र सकर हुन् ?” भनी ट्रम्पलाई तीखो प्रश्न गरेका छन् l उनले यदि यस्तो अभद्र र भद्धा शब्द प्रयोग गरेका हुन् भने यस्तो अपमानजनक वाक्य क्षमा योग्य छैन समेत भनेका छन् l

ट्रम्पले यसलाई अर्को होक्स र फेक न्यूज भनी कडा आलोचना गरेका छन् l दि एट्लान्टिस र अरू जुन समाचार माध्यमले यो समाचार प्रवाह गरेका छन् यी मिडियाहरु तल्लो दर्जा र लोकप्रियता खस्केका मिडिया हुन भनेर ट्रम्पले कठोर प्रहार गरेका छन् l र मिडियामा ल्याउने काम उनले आफ्नै पूर्व मुख्य सचिव (चीफ अफ स्टाफ) जनरल जोन केली हुन् भनेर जनरल केलीलाई  चोर औँला तेर्स्याएका छन् l र जनरल केली कामको बोझ थाम्न नसकेर भागेका भगुवा कर्मचारी हुन् समेत भनेर बिषबमन गरेका छन् l

ट्रम्पले आफूलाई सेनाको भाग्य निर्माता, भेट्रानहरुको आवश्यकताहरुको परिपूर्ति गर्ने नेता र शहीद सेनाहरुको परिवार र आफन्तहरूको पालनकर्ताको रूपमा सम्झिन्थे र धेरै पूर्व सेनाहरु र शहीदका आफन्तहरू उनको समर्थनमा उभिएका थिए l र सन १६ को निर्वाचनमा उनको विजयको एक आधार सेना, पूर्व सेना तिनका परिवार र निधन भएकाहरुको आफन्तहरुको मतको पनि महत्व रहेको थियो l अझै पनि लगभग पचपन्न प्रतिशत उनीहरुको साथ, समर्थन र सहयोग ट्रम्पलाई भएको बिभिन्न सर्बेक्षणहरुले देखाएको छ l

हुनत ट्रम्प पहिलेदेखि नै सेनाको बिषयमा बोलेका कुराहरुको लागि आलोचनाका पात्र बन्दै गएका छन् l पूर्व सिनेटर स्व जोन मेकेन भियतनाम युद्धमा युद्ध-बन्दी हुँदा उनले स्व मेकेनलाई युद्धका नायक हैनन् भनेका थिए र मेकेन युद्द बन्दी हुन तर म युद्ध बन्दी नभएकालाई म मन पराउँछु भनेका थिए l उनले एक अर्को प्रसंगमा मैले जति आईसिएस अरू कुनै जनरलले जान्दैनन् भनेका थिए l उनी भेट्रानस डेको दिन भर्जिनियामा सेनाहरुको समाधीस्थलमा नगएकोमा पनि आलोचित भएका थिए किनकी उनीभन्दा अगाडिका राष्ट्रपतिहरु उक्त दिन त्यहाँ गै सम्मान दिन्थे l राष्ट्रपति अहिलेसम्म वार जोनमा नगएकोमा समेत आलोचना गरिन्छ किनकी उनी सेनाका कमान्डर ईन चीफ समेत हुन् l गोल्ड स्टार फ्यामिली मेम्बर, पिता माता जसका छोरा हुमायुन खानले ईराक युद्धमा आफ्नो जीवन अर्पण गरेका थिए तिनीहरुप्रति कटु अभिव्यक्ति दिएका थिए l हुमायुन खानका पिता खिजर खानलाई मुस्लिम ब्रदरहुडका एजेन्ट भनेर गम्भीर आक्षेप लगाएका थिए l अवकास एडमिरल, पूर्व नेभी सील बील मेक रेभन जसले सद्धाम हुसेनलाई पक्राउ गर्ने र ओसामा बिन लादेनलाई मार्ने अप्रेसनमा मुख्य भूमिका निभाएका थिए, उनलाई हिलारी क्लिन्टन फ्यान, ब्याकर, ओबामा समर्थक भनी गम्भीर आरोप लगाएका थिए l ट्रम्पले २०१६ को चुनाबको बेला भेट्रानका लागि भनेर छाड्न  मिलियन डलर रकम जम्मा गर्ने र आफूले पनि त्यसमा एक मिलियन हालिदिने घोषणा गरेका थिए जुन उनले कहिल्यै पूरा गरेनन् l

डोनाल्ड ट्रम्प न कहिल्यै सेनामा सामेल भए नत बिगतका युद्धमा सेनामा सहभागी भएर देशको रक्षा र देशबासीको सुरक्षामा उपस्थित जनाए l भियतनाम युद्धमा उनी पाँच पटक सेनामा संलग्न हुनु पर्थ्यो, पाँचै पटक गएनन्, चार पटक पढाई भनेर र एक पटक खुट्टाको हड्डीमा चोट लागेर उपस्थित भएनन् l रसियाले अफगानिस्तानमा रहेका अमेरिकी सेनालाई मार्न तालिबानहरुलाई रकम उपलब्ध गराउने भन्ने संचार माध्यममा आएको समाचारलाई होक्स र फेक न्यूज भनेका थिए l त्यसबेला भ्लादिमिर पुटिनबाट अमेरिकी सेनाको टाउकाको मूल्य तोकिदिएका थिए तालिबानले मारेमा l

बिगतका दिनमा के बोले भन्दा पनि चुनाव सन्निकटमा पहिलो विश्वयुद्धमा लडेर जीवन आहूति दिने सेनाहरुप्रति बोलेको वाक्य र गरेको कार्यले सेना, पूर्व सेना र तिनीहरुका आफन्त र अमेरिका र अमेरिकाबासीका लागि ज्यान गुमाएका श्रीमान, श्रीमती, बुवा, आमा, छोराछोरी, नातागोता, आफन्त र मित्रहरुको परिवारलाई भित्रैदेखि चोट पुर्याएको छ l पीडामाथि झन पीडित बनाएको छ l अमेरिका नै एक त्यस्तो देश हो जुन देशका मुलुकबासीले गोल्ड स्टार, पर्पल हर्ट् परिवार सदस्यहरुको चित्त दुखेको सुन्न हेर्न र महसुस गर्न सक्दैनन् र सेना र त्यस संगठनलाई औधि माया गर्छन् र यस सँस्था र सँस्थाका व्यक्तिप्रति गरिएको भेदभाव, अन्याय, अत्याचार, अपमान र असमान र असम्मान व्यबहार सहन गर्न सक्दैनन्, यदि ट्रम्पबाट यस्तो विचार र व्यवहार गरिएको हो भने उनीलाई जनताले जनमतबाट सजाय दिनेछन्  नोभेम्बर  ३ मा र अबश्य दिनु पनि पर्छ l