काठमाडौं । प्रधानन्यायाधीश चोलेन्द्रशमशेर जबराको राजीनामा माग्दै लामो समयदेखि आन्दोलन गरिरहेको नेपाल बार एसोसिएसनले कोभिड बढेपछि आन्दोलनको स्वरूप बदलेको छ । बारले बिहीबारदेखि भर्चुअल माध्यमबाट विरोधका कार्यक्रम गर्ने बताएको छ ।
नेपाल बारले प्रधानन्यायाधीश बिचौलियाको नाइकेजस्तो भएको, मुद्दाको पेसी तोक्दा मनपरी गरेको लगायतका आरोप लगाउँदै उनले राजीनामा दिनुपर्ने माग राखेर धेरै अघिदेखि आन्दोलन गरिरहेको छ । उनीहरुले प्रमुख राजनीतिक दलका नेताहरुलाई भेटेर महाअभियोग लगाउन पनि दवाव दिइसकेका छन् ।
बारमा महासचिव लीलामणि पौडेलद्वारा जारी विज्ञप्तिमा भनिएको छ ‘विरोध कार्यक्रमको वर्तमान स्वरूपलाई परिवर्तन गरी भर्चुअल माध्यमबाट कानुन व्यवसायी, नागरिक समाज, राजनीतिक दल, सांसदसमेतसँग व्यापक जनमत सिर्जना गर्ने, राजीनामा दिन वा महाभियोग लगाउन बाध्य पार्ने वातावरण बनाउने र यसैबीच प्रधानन्यायाधीश जबराले थप सक्रिय भई थप भूमिका लिन लागेमा भौतिक रूपमा नै सशक्त विरोध गर्ने । ’
कोभिडको मौका छोपी प्रधानन्यायाधीशको हैसियतमा जबराले कुनै महत्वपूर्ण कार्य गरे, कार्यक्रम गरे वा बैठक बोलाए त्यसमा सहभागी नभई बहिष्कार गर्नसमेत बारले सरोकारवाला पक्षहरूसामु आग्रह गरेको छ ।
प्रतिक्रिया लेख्नुहोस्:-