दूरबिन नेपाल, न्युयोर्क
अमेरिकी राष्ट्रपति डोनल्ड ट्रम्पले अवैध रुपमा अमेरिका आउनेहरुलाई फर्काइने बताएका छन । अमेरिकी सिनेटबाट महाअभियोगको अन्तिम फैसला हुनु एक रात अघि अमेरिकी कंग्रेसको संयुक्त सभा अर्थात स्टेट अफ युनियनलाई सम्बोधन गर्दै ट्रम्पले अवैध रुपमा अमेरिका आउनेहरुलाई कुनै स्थान नभएको बताएका छन । उनले अवैध आप्रवासीहरुका कारण असुरक्षा बढेको र न्युयोर्क र क्यालिफोर्नीया जस्ता राज्यको कानुन फितलो भएका कारण अवैध तथा आपराधिक पृष्ठभुमिका आप्रवासीहरुले पनि मुक्ति पाइरहेको आरोप लगाएका छन । आगामी कार्यकालमा आप्रवासीहरुप्रति झन कठोर हुने संकेत गर्दै ट्रम्पले अवैध आप्रवासनलाई रोक्न मेक्सीकोको सिमामा पर्खाल लगाउने कार्यपनि उल्लेख्य रुपमा अघि बढिरहेको बताए । अर्को बर्ष अझ तिब्र गतिमा काम हुने दावी गरे ।
रोजगारी र आर्थिक प्रगतिको बयान
राष्ट्रपति ट्रम्पले अमेरिका आफ्नो कार्यकालमा अहिले सम्मकै उत्कृष्ट लयमा हिडिरहेको दावी गरेका छन । अमेरिकी कंग्रेस अर्थात स्टेट अफ द युनियनलाई सम्बोधन गर्दै ट्रम्पले तीन बर्षको आफ्नो उपलब्धिको बयान गर्न धेरै समय खर्चेका थिए । आफ्नो कार्यकालमा बेरोजगारी दर ५० बर्ष यताकै कम भएको दावी गरेका छन । तीन बर्षमा अफ्रिकन, स्पेनीस तथा एशियन अमेरिकनको बेरोजगारी दरमा पनि निकै कमी आएको दावी गरे । महिला बेरोजगारी तथा गरिबीको दरमा पनि उल्लेख्य सुधार भएको बताए । सेभेन मिलियन नयां रोजगारी श्रृजना गर्न सक्नु ठुलो उपलव्धि भएको उनको दावी छ ।
आगामी बर्ष हेल्थ केयरमा सुधार गरिने आस्वासनपनि ट्रम्पले दिएका छन । औषधिको मुल्यमा कमी ल्याउन पहल गरिने बताएका छन । अमेरिकी स्वास्थ्य बिमालाई सबैको पहुंचमा लैजाने बाचा पनि गरेका छन । चीनसंगको ट्रेड डिलको प्रसंशा गर्दै ट्रम्पले यसले अमेरिकालाई निकै फाइदा भएको दावी गरेका छन । कोरोना भाइरसको नियन्त्रणकोलागि चीनीयाँ सरकारसंग सहकार्य भइरहेको बताए । आइएसआइएस नेता बगदादी र इरानीयन जनरल कास्सेम सोलेमानीको हत्यालाई ठुलो उपलव्धी मान्दै ट्रम्पले सोलेमानी र बगदादीको मृत्युले अमेरिका थप सुरक्षित भएको दावी गरे ।
सभामख पेलोसीसंग हात मिलाएनन ट्रम्पले
राष्ट्रपति ट्रम्पले सम्बोधन गरिरहंदा रिपब्लिकन सांसदहरुले उठेर ताली बजाइरहका थिए भने अधिकांश डेमोक्रयाटहरु भने शान्त थिए । डेमोक्रयाटीक सांसद तथा सभामुख न्यान्सी पेलोसीले सम्बोधनको शूरुमा हात मिलाउन हात दिंदा ट्रम्पले उपेक्षा गरी नदेखझै गरे । न्यान्सी पेलोसीकै कारण प्रतिनिधि सभाबाट ट्रम्प विरुद्ध महा अभियोग प्रस्ताव पारित गरिएको आरोप रिपब्लिकनहरुले लगाउंदै आएका छन । बुधबार अमेरिकी सिनेटमा ट्रम्प विरुद्धको महाअभियोग आरोपमा मतदान हुदैछ । भलै सिनेटमा रिपव्लिकनहरुको बहुमत भएका कारण ट्रम्प विरुद्धको महाअभियोग प्रस्ताव पारित नहुने निश्चितप्राय छ । तर आफु विरुद्धको महाअभियोगको अन्तिम फैसला हुनु अघि ट्रम्पले गरेको सम्बोधनले धेरै अर्थ राख्ने विश्लेषकहरुको भनाइ छ ।
प्रतिक्रिया लेख्नुहोस्:-