बद्री गाैतम
न्युयाेर्क । फेब्रुअरी तीन तारीखका दिन न्युयोर्कको नाइन्टी स्ट्रीट स्थित एल्महष्ट र रुजभेल्ट एभेन्यु जोडिने ठाउँ जसको माथीपट्टी सेभेन ट्रेन चल्छ । सोही सेभेन ट्रेनको प्लेटफर्ममा दिउसाे १२ बजेर ४५ मिनेटको समयमा एक युवाको गोली हानी हत्या गरियो ।
ट्रेनमा सवार नेपाली बिदुर बिष्टले आफ्नो माेवाइलमा सो दृश्य कैद गर्न भ्याएछन् । सोही भिडियोका आधारमा गोली प्रहार गर्ने शंकास्पद व्यक्ति २६ बर्षिय रामिरो गुतिरेज नियन्त्रणमा आइसकेको प्रहरीको दावी छ । प्रहरीका अनुसार गोली प्रहारबाट मारिने व्यक्ति २० बर्षिय अल्बेल मोसो हुन ।
प्रहरीले हत्या गर्ने र मारिने व्यक्ति दुई फरक फरक आपराधिक गिरोहका सदस्य रहेको बताएको छ । गोली प्रहार गर्ने रामिरो आपराधिक समुह एम एस थर्टिन (एमएस – १३) मा संलग्न रहेको प्रहरीको दावी छ भने गोली प्रहारबाट मारिने मोसो अर्को आपराधिक समुह १८ स्ट्रीट ग्यांगका सदस्य रहेको न्युयोर्क प्रहरीले बताएको छ ।
अमेरिकाको न्युयोर्क जस्तो शहरको व्यस्त स्थान, जहाँ लगातार ट्रेनहरु गुडिरहेका हुन्छन, सुरक्षा स्थितीपनि मजबुत पारिएको हुन्छ । मिनेट मिनेटमा प्रहरीकाे गस्ति हुन्छ । मानिसहरुको चहलपहल पनि निकै हुने गर्दछ । सोही स्थानमा दुई आपराधिक समुहविच गोली हानाहान हुन्छ अनि एक जना व्यक्तिको तत्कालै ज्यान जान्छ ।
न्युयाेर्क टाइम्सकाे एक तथ्याङ्क अनुसार गत वर्ष गोली प्रहारबाट वर्षमा ४० हजार मानिसले अमेरिकामा ज्यान गुमाएको उल्लेख छ । त्यसमा ग्यांग फाइट एउटा महत्त्वपूर्ण पक्ष हो ।
के हो त एम एस थर्टिन
यो घटनापछि आपराधिक समुह एम एस थर्टिन (एमएस – १३) का बारे चासो बढ्नु स्वभाविकै हो । संसारकै शक्तिशाली मुलुक अमेरिकाको सुरक्षा निकायलाइ नै चुनौती दिने आपराधिक समुह एम एस थर्टिनका बारे केहि जान्ने प्रयास गरिएको छ । आखिर के हो त एम एस थर्टिन । मारा साल्भाट्रूचा को छोटकरी नाम हाे एम एस थर्टिन ।
यसकाे इतिहास बुझ्न सन् सत्तरी-असीको दशकतिर फर्कनु पर्दछ । जुन समय शीतयुद्ध चरम अवस्थामा थियो । जुनसुकै बेला पनि अमेरिका र सोभियत संघका विच युद्ध हुन सक्ने त्रासदी थियो । सोही समयमा अमेरिकी महादेशका अधिकांश मुलुकहरु आन्तरिक द्वन्द्वमा फसीरहेका थिए । यस्तै समस्यामा रुमल्लीइ रहेको अमेरिकी महादेशको एक मुलुक हो, एल साल्भाडोर ।
एल साल्भाडोरको आन्तरिक द्वन्द्व चरमोत्कर्षमा पुगेपछि सुरक्षाको खोजीमा अमेरिका छिर्ने साल्भाडोरियनहरुको संख्यापनि निकै बढ्न पुग्यो । अमेरिकाको लस एन्जलस क्षेत्रमा शरणको खोजीमा आउने एल साल्भाडोरियनहरुको बाहुल्य भएको क्षेत्र हुन थाल्यो । कतिपय त पहिलेदेखि नै सो क्षेत्रमा स्थापित पनि भइसकेका थिए । तर अमेरिकाले उनीहरुलाइ कानुनी मान्यता दिएन । शरणार्थीको रुपमा अमेरिका बस्न चाहिरहेका एल साल्भाडोरियनहरुकाे मागलाई अमेरिकी सरकारले अस्वीकार गरिदियो ।
मेक्सिकन, होण्डुरस अनि एशियन मुलका मानिसहरुको दवदवाबाट एल साल्भाडोरियनकाे सुरक्षाका लागि भन्दै लस एन्जलस क्षेत्रमै जन्मियाे एम एस थर्टिन । केही युवाहरुले आफ्नो समुदायको सुरक्षाको लागि भन्दै स्थापना गरेका थिए एम एस थर्टिन । स्वदेश फर्किउँ, लामो द्वन्द्वपछि पनि मुलुकको अवस्थामा खासै सुधार छैन, अमेरिकामा बसौं बैधता छैन । यस्तै यस्तै अन्योलका बिचमा जन्मिएको एम एस थर्टिन, कालान्तरमा संसारकै डरलाग्दो आपराधिक गिरोहको रुपमा परिणत हुन पुग्यो ।
ग्यांगमा आवद्धहरुको संख्या झण्डै ५० हजार
अर्नेष्टो डेराज भन्ने व्यक्तिको नियन्त्रणमा गइसकेपछि यो समुह परम्परावादी आपराधिक गिरोहको रुपमा विकसित हुदै आएको अनुमान गरिन्छ । अपराधको दुनियाँमा सनसनी मच्चाउंदै आएको यो गिरोहका सदस्यहरु अमेरिकामा मात्रै दश हजार भन्दा धेरै रहेको अनुमान गरिन्छ । अमेरिका भन्दा बाहिर यो गिरोहमा आवद्धहरुको संख्या झण्डै ५० हजारको हाराहारीमा रहेको अनुमान लगाइन्छ ।
अमेरिकाकाे लस एन्जलस, सन फ्रान्सिस्को, बोस्टन, भर्जिनिया, न्युयोर्कका क्वीन्स, लङ आइल्याण्ड, वसिङटन डिसी, न्यु जर्सी, मेरिल्याण्ड, मेसाचुसेट, नर्थ क्यारोलाइना, जर्जिया र टेक्सस लगायतका क्षेत्रमा यो गिरोह सक्रिय रहेको बताइन्छ । एम एस थर्टिनको मुख्य धन्दा अमेरिका बाहेक, क्यानाडा, एल साल्भाडोर, ग्वाटेमाला र होण्डुरसमापनि उत्तिकै सक्रिय रहेको छ । यो आपराधिक समुहले अपराधको दुनियाँका अधिकांश काम गर्छ । नगर्ने अपराध केही छैन यसको ।
यो समुहले अपराधको संसारमा नगर्ने कामहरु सायदै भेटिएलान् । लागु औषधको तस्करी देखि हतियारको अवैध कारोवारलाई त मुख्य पेशा बनाएको छ यो समुहले । त्यतीमात्र होइन, यो समुहले आप्रवासीहरुलाई अवैध रुपमा अमेरिका छिराउने र आपराधिक काममा लगाउने गर्दछ । हत्या, चोरी डकैती गनि साध्धे छैन । बेश्यावृत्ति र मनी लौण्डरीङका कामपनि यो गिरोहले गराउछ । विशेषगरी बीस बर्षभन्दा मुनीका युवा युवतीहरु यसको निशानामा पर्ने गरेका छन ।
पारिवारीक विखण्डनको शिकार भएका तथा अभिभावकत्वको अभावमा एकांकी बन्न पुगेका युवा युवतीहरुलाई यो समुहले आफ्नो गिरोहमा सामेल गराउंछ । विभिन्न प्रलोभन देखाउने, प्रलाेभनमा नपरे जबरजस्ती आफ्नो गिरोहमा सामेल गराउँछ । महिलाहरुलाई जबरजस्ती यौन पेशामा लाग्न बाध्य पार्नु, युवाहरुलाइ डर र धम्की देखाएर आपराधिक क्रियाकलापमा लगाउनु यो समुहको उद्धेश्य हो ।
कोही व्यक्ति एम एस थर्टिनमा आवद्ध छ छैन कसरी चिन्ने ? यो नै मुख्य समस्या हो । केहि सदस्यले यसको नामबाट ट्याटु खोपाउने गरेको पाइएपनि सबैले ट्याटु खोपाउदैनन यसकारण पहिचान गर्न अप्ठेरो पर्छ । अमेरिकी प्रहरीले यो गिरोहका विरुद्धमा विभिन्न अपरेसनहरु चलाउंदै आएको छ ।
लस एन्जलस, बोस्टन लगाउयतका क्षेत्रमा एम एस थर्टिनका विरुद्धमा ठुलै कारवाही चलाइएको थियो । तर पनि यो आपराधिक गिरोहको सक्रियता उस्तै छ । अमेरिका बाहेक एल साल्भाडोर, होण्डुरस र ग्वाटेमाला लगायतका मुलुकहरुमा यो समुहका विरुद्धमा विभिन्न कारवाही चलाइदै आएको भनिन्छ । तर यो गिरोह झन झन बलियो हुंदै गएको अनुमान गरिन्छ ।
अमेरिकी राष्ट्रपतिको पनि चासो
अपराधको दुनियामा त्रासदी मच्चाइरहेको एम एस थर्टिन ग्याँङ, अमेरिकी राजनीतिमा पनि बहसको विषय बन्दै आएको छ । अमेरिकी राष्ट्रपति डोनल्ड ट्रम्पले आफ्नाे निर्वाचन अभियानका बेला यो समुहको अन्त्य गरिने बताएका थिए । उनले आप्रावासी सम्बन्धि डेमोक्र्याटहरुको गलत नीतिका कारण एम एस थर्टिन ग्याँङको प्रभाव बढ्दै गएको आरोप लगाउदै आएका छन ।
राष्ट्रपति ट्रम्पले आप्रावासी सम्बन्धि आफ्नो कडा नीतिको बचाउ गर्नु पर्दा आप्रवासीहरुकै बाहुल्यता रहेको आपराधिक समुह एम एस थर्टिनको उदाहरण दिने गर्दछन । ट्रम्पले यस्तो समुहलाई संरक्षण गरेको भन्दै ओबामा प्रशासनमाथी आरोप लगाउंने गरेका छन । त्यस्तै एल साल्भाडोरका तत्कालिन राष्ट्रपछि अन्टोनियो साका र होण्डुरसका तत्कालिन रक्षामन्त्री अस्कर अल्भारेजले एम एस थर्टिनको आतंककारी संगठन अल कायदासंगलपनि सहकार्य रहेको आरोप लगाएका थिए । तर अमेरिकी गुप्तचर संस्था एफबीआइले भने यो गिरोहको अल कायदासंग सहकार्य नभएको बताएको थियो । अब आँफै अनुमान लगाउँ, अमेरिका जस्तो सर्वशक्तिमान मुलुकमा त यस्तो प्रभाव जमाउन सफल रहेको यो आपराधिक समुहले एल साल्भाडोर, होण्डुरस तथा ग्वाटेमाला जस्ता मुलकमा कस्तो त्राही त्राही मच्चाइरहेको होला ।
एजेन्सीकाे सहयाेगमा
प्रतिक्रिया लेख्नुहोस्:-