दूरबिन नेपाल, न्युयोर्क
अमेरिकामा नेपाली संस्कृति र चाडपर्वहरुको प्रवद्र्धन गर्नेक्रम निकै बढिरहेको छ । अमेरिकामा रहेका विभिन्न जाती र समुदायले आफ्ना मौलिक संस्कृति र पर्वहरु मनाउने क्रममा युनाइटेड मुगुम अर्गनाइजेशनले सोनाम ल्होसार पर्व भव्यताका साथमा मनाएको छ । न्युयोर्कको क्वीन्समा आयोजित कार्यक्रममा अर्गनाइजेशन तथा ल्होसार कार्यक्रमका अध्यक्ष पेमा नाकग्यालले पहिलेदेखि नै ल्होसार मनाइरहेपनि नेपाली संघसंस्थासंग मनाउन पाउनुलाई उपलव्धिको रुपमा लिएका थिए । उनले आगामी बर्षहरुमा यसरी नै संगठित रुपमा चाडपर्वहरु मनाइने बताएका थिए ।
कार्यक्रमका प्रमुख अतिथि आदिवासी जनजाति महासंघ (फिफ्ना)का अध्यक्ष लोक चेम्जोङले मुगुम अर्गनाइजेशनको प्रसंसा गर्दै मुगाली समाज नेपालमा विशेष पहिचान भएको समुदाय भएको बताए । अध्यक्ष चेम्जोङले नेपालीको पहिचान विभिन्न जातजातिको संस्कार र संस्कृति पनि भएको बताउँदै नेपालमा पहिचानको सहितको संघीयता स्थापित हुनुपर्ने बताए । उनले अमेरिकाको जनगणना २०२० मा दर्ता हुन समेत अनुरोध गरेका थिए । संस्थाका सचिव गेलेक नामग्यालले स्वागत मन्तव्य दिंदै मुगालीहरुको भेष भुषा विशेष भएको र मुगालीहरुले आफ्नो भेषभुषाको जगेर्ना गर्नुपर्ने बताए । मुगुमका मुगाली लामा र प्रमुख अतिथिद्धारा गौतम बुद्धको मूर्तिमा खादा चढाएर नेपाली राष्ट्रिय गान र अमेरिकी राष्ट्रिय गान गएर कार्यक्रमको शुरुवात गरिएको थियो । सोहि अवसरमा नेपाल अमेरिका कलाकार संघका अध्यक्ष सुमन बुढामगरले मुगाली समाज आफ्नो पारिवारिक समाज रहेको बताउँदै मुगाली समाजको संस्कृति र भेषभुषाका बारेमा प्रसंसा गरेका थिए । त्यस्तै ढोक्पे किदुंगका अध्यक्ष गोभा जीवन लामाले मुगाली समाज र आफ्नो समाजको संस्कार धेरै कुरामा मिल्दोजुल्दो रहेको बताउँदै सुरुका दिनमा आफ्नो समाजले पनि यसरी नै सुरुवात गरेको बताए ।
एभरेष्ट टाइम्सका सम्पादक निमा पाख्रिनले नेपालमा मुगाली समाज धेरै चर्चित समाज रहेको बताउँदै आफ्नो मौलिक परम्परालाई जोगाउँदै आफ्नो हकअधिकार र पहिचानको लागि एक हुनुपर्ने बताए । दोश्रो चरणमा सांस्कृतिक कार्यक्रम प्रस्तुत गरिएको थियो । कार्यक्रममा नेपालका चर्चित डान्सर गिता राईको नृत्य थियो भने कलाकारहरु छिरिङ तेन्पा, ज्याम्पा तेन्जिन, गेलेक नामग्याल, भिटिक, छिरिङ भिटिक, गालदेन, तेन्जिन साङमो, कुङगा डीमे, टाशी दुन्डुप र कुञ्जोम तथा सुमन बुढामगर, गीता राई, सुवर्ण शाक्यले आ–आफ्नो कला प्रस्तुत गरेका थिए ।
कार्यक्रमकी संयोजक तथा जनजाति महासंघ अमेरिकाकी सचिव टोमा लामाले कार्यक्रम सञ्चालन गर्दै आफूले खेलेका फिल्मका केही झलक पनि प्रस्तुत गरेकी थिइन् । उनले मुगालीहरुको आफ्नै संस्कार र संस्कृति भएकाले राज्यले यस विषयमा विशेष ध्यान दिनुपर्ने बताइन् । उनले मुगाली समुदाय आफ्नो हक अधिकारका लागि संसारको जुनै ठाउँमा भएपनि एक भएर अगाढी बढ्ने समेत बताएकी थिइन् ।
प्रतिक्रिया लेख्नुहोस्:-