दूरबिन नेपाल, न्युयोर्क
अमेरिकी राष्ट्रपति डोनल्ड ट्रम्पले अमेरिकामा कोरोना भाइरसको खतरा रहेपनि त्यो कम रहेको दावी गरेका छन । राष्ट्रपति भवन ह्वाइट हाउसमा पत्रकार भेटघाट कार्यक्रममा ट्रम्पले अमेरिकामा बर्षेनी मौसमी फ्लुका कारण मानिसहरु बिरामी हुने र मर्ने गरेका कारण यसबारे पहिलेदेखिनै सचेतना अपनाइएकोले कोरोना भाइरसको प्रभावपनि कम हुने दावी गरे । कोरोना भाइरस फैलिएमा जुनसुकै कदम चाल्न पनि सकिने संकेत गरे । ट्रम्पले साढे दुई बिलियन डलर बिनियोजनको लागि कंग्रेससंग अनुमति लिने जानकारी दिए । राष्ट्रपति ट्रम्पले उपराष्ट्रपति माइक पेन्सलाई कोरोना भाइरसको प्रतिक्रिया दिन सरकारको तर्फबाट मुख्य व्यक्ति तोकिएको जानकारी पनि दिएका छन । मंगलबार मात्रै अमेरिकाको सेन्टर फर डिजिज कन्ट्रोल एण्ड प्रिभेन्सन (सिडिसी)ले अमेरिकामा कोरोना भाइरसको खतरा उच्च रहेकोले बेलैमा सचेत रहन चेतावनी दिएको थियो ।
“न्युयोर्कमा खतरा छ, तर अहिलेसम्म कोरोना भाइरस देखिएको छैन” मेयर ब्लाजिओ
न्युयोर्कका मेर बिल डे ब्लाजिओले न्युयोर्कमा अहिलेसम्म कोरोना भाइरस नदेखिएको दावी गरेका छन । ब्लाजिओले बुधबार सम्बोधन गर्दै कोरोना अहिलेसम्म नदेखिएपनि यसको सम्भावना र उच्च जोखिम भने रहेको चेतावनी दिएका छन । उनले यतिबेला कोरोनाको सम्भावित संक्रमणबाट जोगिन वा उपचार गर्न अस्पतालमा पनि केही तयारी गरिएको जानकारी दिएका छन । सम्बोधन गर्दै मेयर ब्लाजिओले कोरोना भाइरस संक्रमीतहरुको लागि १२ सय शैया अस्पतालमा छुट्याइएको बताएका छन । उनले एक दशमलव पाँच मिलियन मास्कहरु स्टकमा रहेको र वितरण गरिएको र अझै तीन लाख मास्कको आवस्यकता पर्नेहुंदा संघीय सरकारसंग माग गरिएको जानकारी गराएका छन । मेयरले संघीय सरकारसंग त्यसको लागि आग्रह गरेका छन । मेयर ब्लाजिओले कोरोनाको जांच गर्ने स्थानहरु थप्न तथा न्युयोर्कमै ल्याब परिक्षणको व्यवस्था मिलाउन संघीय सरकार र सिडीसीसंग आग्रह गरेका छन । कोरोनाको सम्भावना भएपनि नआत्तिकन सरकारी तथा स्वास्थ्यकर्मीहरुलाई आफ्नो स्वास्थ अवस्थाकाबारे जानकारी गराउन आग्रहपनि गरिएको छ । यदि कोही बिरामी भएमा घरमै बसेर स्वास्थ्यकर्मीलाई जानकारी गराउनपनि आग्रह गरिएको छ ।
त्यसैगरि न्युयोर्कका गभर्नर एण्ड्र्यु कुमोले न्युयोर्कको सदनसंग ४० मिलियन रकम कोरोना भाइरसको प्रतिरक्षाको लागि माग गरिएको बताएका छन ।
लङ आइल्याण्डमा ८३ जना क्वारेन्टाइनमा
न्युयोर्कको लङ आइल्याण्डको नासाउ काउन्टीमा ८३ जना व्यक्तिहरुमाथी कोरोना भाइरसको आशंकामा अनुसन्धानमा राखिएको जनाइएको छ । ८३ जना सबै चीन भ्रमणबाट फर्केको बताइएको छ । उनीहरुलाई दुइ हप्ताको लागि क्वारेन्टाइनमा राखिएको बताइएको छ । उनीहरुलाई कोरोना नभएको पुष्टि नभएसम्म अन्य व्यक्तिहरुसंग संसर्गमा आउन नदिइएको नासाउ काउन्टीका स्वास्थ्य अधिकारीहरुले जानकारी दिएका छन ।
तस्विरःएजेन्सी
प्रतिक्रिया लेख्नुहोस्:-