अमेरिकाको न्युयोर्कमा वालुङ समुदायले मनायो ल्होसार

टोमा लामा, दूरबिन नेपाल, न्युयोर्क
हाल अमेरिकामा बसोबास गरिरहेका नेपालको ताप्लेजुङ जिल्लाका वालुङ समुदायले न्युयोर्कमा ल्होसार पर्व मनाएका छन । वालुङ कम्युनिटीका अध्यक्ष छिरिङ तोप्ग्यालको नेतृत्वमा मनाइएको ल्होसार कार्यक्रममा अमेरिकामा गुम्बा स्थापनार्थ ट्रष्टी बोर्ड तयार भएको र आर्थिक संकलन तिव्र रुपमा अघि बढेको जानकारी दिइएको थियो । आर्थिक संकलनकालागि घरदैलो लगायतका कार्यक्रमहरु तय गरिएको जानकारी कम्युनिटीका अध्यक्ष तोप्ग्यालले दिए । विदेशमा बसेपनि अफ्नो भाषा धर्म तथा संस्कृतिको रक्षार्थ सबै लाग्नुपर्नेमा जोड दिंदै भावी पीढीका लागिपनि बच्चाहरुलाइ विभिन्न मौलिकता तथा भाषा सिकाउने कक्षाहरु सञ्चालन गर्ने योजना रहेको जानकारी कम्युनीटीका अध्यष तोपग्यालले दिए ।

कार्यक्रमका प्रमख अतिथि न्युयोर्कका कार्यवाहक महाबाणिज्य दुत पुष्पराज भट्टराईले विदेशमा भए पनि आफ्नो देशको संस्कार संस्कृति संरक्षण गर्न नेपाली समुदाय सबै क्षेत्रबाट लागि परेकोमा खुशी व्यक्त गरे । भट्टराईले विश्वभरी नै महामारीको रुप लिएको कोरोना भाईरसका कारण समस्या बढ्दै गएकोले सबैलाई सचेत हुन पनि आग्रह गरेका थिए ।

कार्यक्रमका विशेष अतिथि नेपाल आदिवासी जनजाति महासंघ अमेरिका (फिप्ना)का अध्यक्ष लोक चेम्जोङले नयाँ सालको आगमनमा आउने ल्होसार कार्यक्रम भाईचारा र भेटघाटमात्र नभएर यसले सहकार्यलाई मजबुत बनाउने हुंदा नेपाली समुदायलाई अगाडि बढ्ने अवसर दिलाएको बताए । उनले विदेशमा भए पनि हाम्रो पहिचान विविधतामा एकताको सन्देश जाने अवसर मिलेको भन्दै आउने नेपाल महोत्सव हामी सबै नेपाली समुदाय एक भएर सफल पार्न सबैले सहयोग गर्नुपर्ने बताए । कार्यक्रममा संस्थाका सक्रिय सदस्य लाक्पा लामाले स्वागत मन्तव्य दिएका थिए भने संस्थाका सचिव डन्डु शेर्पाले कार्यक्रम सञ्चालन गरेका थिए । कार्यक्रममा पूर्व अध्यक्षहरुलाई सम्मानपनि गरिएको थियो ।

वालुङ नेपालको ताप्लेजिङ जिल्लाको एक गाविस हो । सामरिक दृष्टिले महत्वपुर्ण मानिएको सो स्थान टिबेट र नेपालको सिमा क्षेत्रपनि हो । वालुङ क्षेत्रमा बसोबास गर्नेहरुलाइै वालुङ समुदाय भनिएको हो । सो क्षेत्रमा डिकी छ्योलिङ भन्ने ऐतिहासिक गुम्बापनि रहेको छ । धार्मिक दृष्टिले महतवपुर्ण मानिएको सो गुम्बा नेपालकै दोस्रो गुम्बा भएको वालुङ कम्युनीटीका अध्यक्ष तोप्ग्यालले जानकारी दिए । सो गुम्बामा बर्षमा चार पटक विभिन्न धार्मिक विधिबाट पुजा र सांस्कृतिक कार्यक्रम गरिन्छ । सो बेला देश विदेशबाट भक्तजनहरुको बाक्लो उपश्थिती हुने गर्दछ । वालुङ क्षेत्रको धार्मिक तथा सामरिक महत्वलाई विश्वभरी चिनाउन वालुङ समुदाय अमेरिकामापनि सक्रिय रहेको जानकारी कार्यक्रममा दिइएको थियो ।