दूरबिन नेपाल, न्युयोर्क
अमेरिकामा बसोबास गरिरहेका नेपालका विभिन्न जाती तथा समुदायले आफ्ना चाड तथा पर्वहरुलाई भव्यताका साथ मनाउनेक्रम बढिरहेको छ । यसैको पछिल्लो उदाहरण बनेको छ , २१४७ औं झिवा ल्होसार । अमेरिकामा बसोबास गरिरहेका तोक्पेगोला (ढोक्प्या) समुदायले न्युयोर्कस्थित क्विन्स प्यालेसमा भब्यताका साथ २१४७ औं झिवा लोसार साँझ मनाए । तोक्पेगोला समाज सेवा समिति काठमाडौंको प्रवास शाखा ढोक्प्या किदुकले ‘भाषा, धर्म र संस्कृतिको संरक्षण गरौं, आफनो पहिचान कायम राखौ’ भन्ने नारासहित ७ मार्चमा झिवा लोसार साँझ मनाएको हो । कार्यक्रम ढोक्प्या किदुकका न्युयोर्कका अध्यक्ष गोवा ढोक्प्याको अध्यक्षतामा सम्पन्न भएको हो । सो कार्यक्रममा प्रमुख अतिथि नेपाल आदिवासी जनजाति महासंघ अमेरिका (फिप्ना) का अध्यक्ष लोक चेम्जोङ लिम्बूले नेपालको संघीय प्रणाली पहिचानको आधारमा हुनुपर्ने र नेपालको सामाजिक, भाषिक, संस्कृतिक र समुदायगत विविधता अनुसारको राज्य संरचना, संविधान र ऐन कानुन निर्माण हुनुपर्नेमा जोड दिए । उनले वर्तमान सरकार आदिवासी जनजातिहरुको आवाज सुन्नै नचाहने र देशको सुन्दर विविधतालाई तहसनहस पार्न अग्रसर भइरहेको आरोप लगाए । चेम्जोङले संयुक्त राज्य अमेरिका राष्ट्रिय जनगणनाको संघारमा भएको हुँदा सबै नेपालीहरुले राष्ट्रिय जनगणनामा गम्भीर भएर सहभागिता जनाउनुपर्ने बताए ।
कार्यक्रममा ढोक्प्या समुदायका औतरी लामा लोब्साङ खेटुक र लामा कासाङ छोम्वेले संयुक्त रुपमा वौद्घ धर्म परम्परा अनुसार पुजापाठ गररेपछि कार्यक्रमको शुभारम्भ भएको थियो । कार्यक्रमको औपचारिक उद्घाटन फिप्नाका अध्यक्ष चेम्जोङले पानसमा दियो बालेर गरेका थिए । किदुकका उपाध्यक्ष ङिमा ढोमा ढोक्प्याले स्वागत मन्तव्य राखेर अघि बढेको कार्यक्रममा ढोक्प्या समुदायको परम्परागत स्याब्रु नाच प्रस्तुत गरिएको थियो । कार्यक्रमको सञ्चालन किदुकका सचिव ज्याल्जेन ढोक्प्याले गरेका थिए । कार्यक्रममा किदुकका सल्लाहकार डण्डु ढोक्प्याले नेपालमा आदिवासी जनजातिहरुले पहिचानको मुद्दालाई निरन्तर उठान गरिरहेको र प्रदेशहरुको नामाकरण पहिचानको आधारमा हुनुपर्ने र प्रदेशभित्र अल्पसंख्यक आदिवासी जनजातिहरुको स्वशासन सहितको स्वायत्त क्षेत्रहरु हुनुपर्ने मागलाई निरन्तर उठान गरिरहेको बताए ।
कार्यक्रममा विभिन्न क्षेत्रमा स्पोन्सर गरी संस्थालाई सहयोग गर्ने दाताहरुलाई प्रमुख अतिथि मार्फत धन्यवादसहित खादा र प्रमाण–पत्र प्रदान गरिएको थियो । कार्यक्रमका सभापति एवं सस्थाका अध्यक्ष ढोक्प्याले अमेरिकामा ढोक्प्या समुदाय थोरै संख्यामा भए पनि संस्था गठन गर्न सफल भएको र संस्था गठन भएदेखि हासम्म निरन्तर हरेक वर्ष लोसार साँझ कार्यक्रम आयोजना गर्दै आएको बताए । उनले लोसार साँझ कार्यक्रमलाई भव्य रुपमा सम्पन्न गर्नका लागि संस्थाको कार्यसमिति सदस्य र ढोक्प्या समुदायका विभिन्न सहयोगदाताहरु, खाद्य पदार्थ, खाना, पानी, पेय पदार्थ, खादा, ध्वनी प्रविधि लगायत सबैलाई धन्यवाद दिए । औपचारिक कार्यक्रम छोटो गरी सम्पन्न गरी नेपाली कलाकार संघ अमेरिकाका अध्यक्ष सुमन बुढा मगरसहितको टोलीले विभिन्न सांस्कृतिक कार्यक्रम गरी मनोरञ्जन प्रदान गरेको थियो ।
प्रतिक्रिया लेख्नुहोस्:-