दूरबिन नेपाल, न्युयोर्क । न्युर्योकमा कोरोना भाइरसको कारण लाग्ने रोग कोभिड १९ बाट पहिलो पटक एकजनाको मृत्यु भएको छ । न्युयोर्कको ब्रुकलिनमा उपचार गराइरहेकी महिलाको शुक्रवार मृत्यु भएको जनाइएको छ । उनी मार्च ३ तारिख देखि अस्पतालमा भर्ना भइ उपचार गराइरहेकी थिइन । न्युयोर्कमा पहिलो पटक कोभिड १९ बाट मृत्यु भएको घटनाको गभर्नर एण्ड्र्यु कुमो र मेयर बिल डे ब्लाजिओले पुष्टि गर्दै दुख व्यक्त गरेका छन । उनीहरुले मृतकको संख्या अझै बढ्न सक्ने बताएका छन ।
मृतक ८२ बर्षीया महिला भएको र उनी पहिलेदेखि नै स्वास प्रस्वासको विरामी भएको बताइएको छ । न्युयोर्कमा हालसम्म पाँच सय २४ जनामा कोरोना भाइरस देखिएको छ भने एक सय १७ जना अस्पतालमा उपचार गराइरहेका छन । कोरोना भाइरसका विरामीहरुको जांच क्षमतामा पनि बृद्धि गर्दै जाने गभर्नर कुमोले जानकारी दिएका छन । यसले संक्रमितहरुको संख्या अर्को हप्तासम्म एक हजारभन्दा धेरै हुन सक्ने गभर्नर कुमोले अनुमान गरेका छन ।
अमेरिकामा अहिले सम्म कोभिड १९बाट ५५ जनाको मृत्यु भइसकेको छ भने झण्डै २४ सय जनामा यसको संक्रमण देखिएको छ । आगामी हप्ता कोरोना भाइरसको परिक्षण क्षमता बढ्ने भएकोले संक्रमितको संख्यापनि निकै बढ्ने अनुमान गरिएको छ ।
प्रतिक्रिया लेख्नुहोस्:-