पार्टी एकीकरण गरेर नेकपा बनाए पनि ओली भिलेनको रुपमा देखा परेपछि पार्टी विभाजित भएको प्रचण्डको स्पष्टोक्ति

काठमाडौं । नेकपा (माओवादी केन्द्र) का अध्यक्ष तथा पूर्व प्रधानमन्त्री पुष्पकमल दाहालले तत्कालीन अवस्थामा नेकपा एमालेसँग पार्टी एकता गर्नु आफ्नो गल्ती नरहेको दावी गरेका छन् ।

उनले सोमबार धनगढीमा प्रदेशस्तरीय प्रशिक्षण कार्यक्रमलाई सम्बोधन गर्दै माओवादी केन्द्रले एमालेसँग पार्टी एकता गरेर नेकपा गठन गरी कम्युनिष्ट एकतालाई मजबुद गर्ने प्रयास भए पनि त्यसको नेतृत्व ‘भिलेन’ हुँदा पछि विभाजित हुनुपरेको प्रष्टिकरण पेश गरे ।

‘गठबन्धन गरेर पार्टी एकता गरौँ । पार्टी एकता गर्नु गलत थिएन’, प्रचण्डले भने, ‘तर, भिलेन फेला पर्‍यो । भिलेनसँग लड्दालड्दै विभाजित हुनुपर्‍यो ।’

एमालेसँग पार्टी एकता गरेर नेकपा गठन भएपछि षड्यन्त्र भएको आरोप लगाएका उनले माओवादीबाट आएका नेताहरूमाथि विभिन्न आरोप लगाएको बताए ।

‘पार्टी एकता गरेपछि हामीमाथि षड्यन्त्र हुनथाल्यो । माओवादीबाट आएका नेतालाई आरोपित गरियो,’ प्रशिक्षण कार्यक्रममा प्रचण्डले भने ।