नेपालले आइसिसी विश्वकप लिग–२ त्रिकोणात्मक क्रिकेट प्रतियोगितामा बुधबार पुपुवा न्युगिनीमाथि दुई विकेटको कठिन जित हात पारेको छ। युएईको सारजहाँ रंगशालामा पपुवा न्युगिनीले निर्धारित ५० ओभरमा आठ विकेट गुमाएर दुई सय चार रनको मध्यम योगफल खडा गरेको थियो।
नेपालको जितमा इनिङ्सको ४९औँ ओभरमा अलराउन्डर करण केसीले आवश्यक रन पुरा गरेका थिए। अन्तिम ओभरमा नेपाललाई ६ बलमा पाँच रन चाहिएको थियो। पुपुवा न्युगिनीबाट अन्तिम ओभर रिलेय हेकुरेले बल फयाकेका थिए। हेकुरेलको पहिलो बल लेग वाईका रुपमा चौका भएको थियो। त्यसपछि दोस्रो बलमा करणले छक्का प्रहार गरी नेपाललाई जित दिलाए।
नेपालले विश्वकप लिग २ मा नौ खेलबाट १० अंक जोडेको छ। नेपाल छैटो स्थानमा छ। करणले २५ बलमा दुई छक्का र एक चौकाको सहयोगमा २९ रनको नटआउट इनिङ्स खेलेका थिए।
यसैगरी मध्यक्रमका ब्याट्सम्यान रोहित कुमार पौडेलले सर्वाधिक ५८ रनको योगदान दिए। रोहितको यो चौथो एकदिवसीय अर्धसतक हो। उनले ८५ बलमा चार चौका प्रहार गरेका थिए। आरिफ शेख ८१ बलमा दुई चौकाको सहयोगमा ५३ रन बनाए। आरिफको यो पहिलो एकदिवसीय अर्धसतक हो।
प्रतिक्रिया लेख्नुहोस्:-