नवनियुक्त राजदूत खत्रीलाई एनआरएनए अमेरिकाले गर्‍यो स्वागत

अमेरिका । अमेरिकाका लागि नवनियुक्त नेपाली राजदूत प्रा डा श्रीधर खत्री गैर आवासीय नेपालीहरूसँग आफू र राजदूतावासका अधिकारीहरू सिधा सम्पर्कमा रहेर कार्य गर्ने प्रतिबद्धता जाहेर गर्नु भएको छ ।  गैर आवासीय नेपाली सङ्घ राष्ट्रिय समन्वय परिषद् (एनआरएनए) अमेरिकाले नवनियुक्त नेपाली राजदूत प्रा. डा. श्रीधर खत्रीको स्वागत र सम्मानमा मार्च १७ तारिक बिहीबार आयोजित कार्यक्रममा सो प्रतिबद्धता जाहेर गर्नु भएको हो । अनलाइन प्रविधि जुम बैठकबाट आयोजित कार्यक्रममा महामहिम राजदूत खत्रीले अमेरिका र नेपाल बिच दोहोरो कर प्रणालीको विषयमा अध्ययन गरेर काम अगाडि बढाउन राजदूतावास तयार रहेको जानकारी गराउनु भयो ।

राजदूत प्रा. डा. श्रीधर खत्रीले एनआरएनए अमेरिकाले कोभिडको महामारीमा गरेका कामको सह्राना गर्नु भयो । उहाँले भन्नु भयो “यस्तो सहयोग मेरो कार्यकालमा पनि हुने छ भन्ने मैले विश्वास लिएको छु ।”   आफ्नो कार्यकालमा दुई संस्था मिलेर अझ प्रभावकारी ढङ्गले काम गर्न इच्छुक भएको बताउनु भएको छ । अमेरिकामा रहेका नेपालीहरूका लागि राजदूतावासले घुम्ती कन्सुलर सेवा  गैर आवासीय नेपाली सङ्घ अमेरिकासँग मिलेर गर्दै आएको छ ।

अमेरिका स्थित नेपाली राजदूतावासमा आएर पदभार सम्हाल्नु भएको उपलक्षमा स्वागत र सम्मानमा आयोजना गरिएको भर्चुअल कार्यक्रममा एनआरएनए अमेरिकाका अध्यक्ष बुद्धि सागर सुवेदीले महामहिम राजदूत प्रा. डा. श्रीधर खत्रीलाई स्वागत गर्दै सफल कार्यकालका लागि शुभकामना दिनु भयो । कोभिड महामारीको समयमा गैर आवासीय नेपाली सङ्घ अमेरिकाले अमेरिकाको सेक्रेटरी अफ डिफेन्स अन्तरगत युटाह नेशनल गार्डको सहयोगमा तीन करोड रुपैयाँ भन्दा बढीको स्वास्थ्य उपकरण र सामाग्री नेपाल पठाउँदा नेपाली राजदूतावासका अधिकारीहरूले गर्नु भएको सहयोग लगायत थुप्रै विषयमा भएका सहकार्यको अध्यक्ष सुवेदीले चर्चा गर्नु भयो ।

 अमेरिकी सरकारले कर छुट दिएका सामाग्रीहरूको छुट अवधि सकिएको र नवीकरणका लागि दुई देश बिच काम अगाडि बढाउन राजदूतावासको ध्यान आकृष्ट गराउनु भएको छ । दोहोरो कर प्रणालीको अन्तका लागि दुई देश बिचमा काम हुनु पर्ने विषयमा अर्थ मन्त्री, अर्थ सचिव र नेपाल राष्ट्र बैङ्कका गभर्नरसँग अन्तरक्रिया गरिएको उल्लेख गर्दै उहाँहरूकै सल्लाह बमोजिम एनआरएनए अमेरिकाले एउटा समिति नै बनाएर काम अगाडि बढाइरहेको बताउनु भयो । यसका सबै पक्षमा अध्ययन गरी काम अगाडि बढाउन नवनियुक्त राजदूत र राजदूतावासको सहयोग अपरिहार्य हुने छ भन्नु भयो ।

एनआरएनए अमेरिकाद्वारा जारी विज्ञप्तिको पूर्ण पाठ यसैसाथ संलग्न गरिएको छ ।