अमेरिका । २३ मार्च २०२० –
अमेरिकामा पछिल्लो २४ घण्टामा कोरोना भाइरसले १ सय ६० जनाको ज्यान लिएको छ । यो समाचार तयार पार्दासम्म भाइरसका कारण ५ सय ८४ अमेरिकनले ज्यान गुमाइसकेका छन् । यो रोग अमेरिकाका सबै राज्यमा तिव्र गतिमा फैलिरहेको भए पनि न्यूयोर्क अत्याधिक सङ्क्रमित राज्य बन्न पुगेको छ ।
बितेको २४ घण्टामा न्युयोर्कमा थप ६८ जनाले कोरोना भाइरसका कारण ज्यान गुमाएका छन् । न्यूयोर्क राज्यमा मात्र ज्यान गुमाउनेको संख्या १ सय ८४ पुगेको छ । संक्रमित संख्या पनि २४ घण्टामा ६ हजार थपिएको छ । न्यूयोर्कमा कुल संक्रमित संख्या २३ हजार ४ सय पुगेको छ ।
करिव ७० हजार नेपालीहरु बसोबास गर्ने न्यूयोर्कमा ४ जना नेपालीहरू समेत कोरोना संक्रमित भएका छन् । जसमा तीन जना उबर- लिफ्ट चालक रहेका छन् । बाकी १ जनाको बिबरण खुलेको छैन । उनीहरूको उपचार जारी छ । संक्रमणबाट अहिलेसम्म जोगिरहेका अधिकांश नेपालीहरू त्रसित अवस्थामा रहेका छन् । घरभित्रै बस्नु पर्ने वाध्यताका कारण सङ्कटमा परेका नेपालीहरूलाई सहयोग गर्न केही नेपाली संघ संस्था र ब्यक्तिहरू लागि परेका छन् । नेपाल तरुण दल अमेरिकाका उपाध्यक्ष अनन्त सुवेदीले आफ्नो फेसबुकमा त्यस क्षेत्रमा रहेका नेपालीलाई सहयोग गर्न जनसम्पर्क समितिका पूर्व संयोजक विष्णु सुवेदीको पहलमा कन्फरेन्स कल भएको जनाएका छन् । उनले दाल, चाम र नुन उपलब्ध गराउने तयारी गरेको उल्लेख गरेका छन् ।
त्यस्तै बाल्टिमोर राज्यका सभासद ह्यारी भण्डारीको पहलमा भएको कन्फरेन्स कल बैठकले अमेरिका र खासगरी बाल्टिमोर क्षेत्रमा अहिलेको प्रतिकुल अवस्थामा समस्यामा रहेका नेपालीहरूलाई कसरी सहयोग गर्ने भन्ने विषयमा छलफल गरेको छ । बैठकमा त्यस क्षेत्रका ४० जना सहभागि भएको विज्ञप्तिमा उल्लेख छ ।
त्यसै गरी पत्रकारहरुको संस्था इन्जाले पनि सचेतना फैलाउन र आवश्यक सहयोग जुटाउने विषयमा कन्फरेन्स कल बैठक गरेका जनाएको छ ।
कोरोना भाइरस संक्रमणका बारेमा हिजो न्यूयोर्क टाइम्सले सार्वजनिक तथ्याङ्कहरूलाई तुलना गर्दै न्यूयोर्कमा विश्व कै ५ प्रतिशत भन्दा बढि कोरोना संक्रमित रहेको समाचार प्रकाशित गरेका थियो । समाचार प्रकाशित भएको २४ घण्टामा संक्रमण दर झनै तिब्र भएको छ ।
न्युयोर्कको छिमेकी राज्य न्युजर्सी समेत कोरोना भाइरसले मृत्यु र संक्रमित हुनेहरुको संख्या वृद्धि भएको छ । न्यु जर्सीका २१ वटा काउन्टीमा फैलिएको कोरोना भाइरसले २७ जनाको ज्यान लिइसकेको छ भने करिव २९ सय संक्रमित भएका छन् ।
अमेरिकामा सबै भन्दा पहिला धेरै जनामा फैलिएको वासिङ्टन स्टेटमा कोरोनाका कारण मृत्यु हुनेको संख्या ११० पुगेको छ । न्युयोर्कमा कोरोना संक्रमण भयाभह रुपमा बढे पछि अहिले वासिंटन दोस्रो बढि प्रभावित राज्य बन्न पुगेको छ । तेस्रो बढि संक्रमित राज्यको रुपमा रहेको क्यालिफोर्नियामा ४३ जनाले ज्यान गुमाउनुका साथै २२ सयमा संक्रमण पुष्टि भएको छ । लुजियाना चौथो बढि प्रभावित राज्य बन्न पुगेका छ । ३५ जनाको मृत्यु भएको छ भने १२ सय भन्दा बढिमा संक्रमण पुष्टि भएको छ । जर्जियामा २६ जनाको मृत्य भइसकेको छ भने ८ सय भन्दा बढि संक्रमित देखिएका छन् । फ्लोरिडामा १८ जनाको ज्यान जानुको साथै १२ सय भन्दा बढिमा संक्रमण रहेको छ । मिचिगन राज्यमा १३ सय भन्दा बढिमा संक्रमण देखिएको छ भने १५ जनाले ज्यान गुमाइसकेका छन् ।
जनसंख्याको हिसाबले दोस्रो ठुलो राज्य टेक्सासमा ९ जनाको कोरोना भाइरसका कारण ज्यान गएको छ साथै ८ सय भन्दा बढि संक्रमित भएका छन् । इलिनोइस १२ , कनेक्टिकट १०, कोलोराडो ७, , इन्डियाना ७ , पेन्सलभेनिया ६, मिजौरी ५ , विस्कन्सिनमा ५, ओरेगनमा ५ जनाको मृत्यु भएको पुष्टि भएको छ ।
केन्टकी राज्यका सिनेटर पाउल सहित ५ जना सिनेटर, अरु ३ राज्यका हाउस अफ रेप्रिजेन्टेटिभ, एक जना मेयर, थुप्रै प्रहरी अधिकृत, र केही संख्यामा हलिउडका कलाकार र खेलाडी समेत करिब हजार मानिस अमेरिकामा कोरोनाबाट संक्रमित भएका छन् । अरु सयौँ मानिसहरुमा परिक्षण र अनुसन्धान जारी छ । कोरोना भाइरस संक्रमित संख्याको हिसाबले अमेरिका विश्वको तोस्रो मुलुक बन्न पुगेको छ ।
तस्बिर: सीबीएस न्युयोर्क
प्रतिक्रिया लेख्नुहोस्:-