दूरबिन संवाददाता ।
अमेरिका मार्च २४ ।
क्यालिफोर्नियामा मङ्गलवार एक बच्चा सहित थप १० जनाको मृत्यु भएको छ । कोरोना भाइरसका कारण क्यालिफोर्नियामा ज्यान गुमाउनेको संख्या ५३ पुगेको छ । मंगलवार नै थप ४ सय जनामा कोरोना भाइरसको संक्रमण भएको पुष्टि भएको छ । कोरोना संक्रमित संख्या क्यालिफोर्नियामा २६ सय नाघेको छ । संक्रमित मध्ये ८ सय भन्दा बढि सिकिस्त भएर अस्पतालको बेडमा छन् । क्यालिफोर्नियामा सबैभन्दा बढि प्रभावित सान्ताक्लारा काउन्टीमा १६ जनाले ज्यान गुमाइसकेका छन् भने एक सय २५ जना कोरोना संक्रमितहरु अस्पतालमा भर्ना छन् ।
केही दिन देखि निक्कै ठुलो संख्यामा कोरोनाको संक्रमण देखिएको लसएन्जलस काउन्टीमा मङ्गलबार साँझ १ किशोर सहित ४ जनाको मृत्यु भएको छ । लसएन्जलस काउन्टीमा ६ सय ६५ जनामा संक्रमण भएको पुष्टि भएको छ । अमेरिकामा १८ वर्ष भन्दा कम उमेर समुहमा कोरोना भाइरसका कारण मृत्यु भएको यो पहिलो घटना हो । यस अघि चीनमा १४ वर्षका एक किशोर र स्पेनमा १६ वर्षका किशोरको कोरोना भाइरसका कारण मृत्यु भएको थियो । सबै भन्दा दुखद पक्ष के छ भने अमेरिकामा १८ देखि ४० वर्ष उमेर समुहमा कोरोना भाइरसको संक्रमण ४० प्रतिशत देखिएको छ । ४० देखि ६५ वर्ष उमेर समुहका मानिसमा ३९ प्रतिशत कारोना भाइरसको संक्रमण देखिएको छ ।
क्यालिफोर्नियाका मुख्य सहरहरू सानफ्रानसिस्को, सानडियागोमा समेत कोरोना भाइरस कालको रुपमा प्रवेश गरेको छ । यी दुई ठूला सहरमा मङ्गलबार कोरोना भइरसका कारण एक एक जनाले ज्यान गुमाएका छन् । सानफ्रानसिस्को सहरमा ४० वर्षीय युवाको कोरोना भाइरसका कारण ज्यान गएपछि मेयर लोन्डन ब्रिडले भने “यो दुखद दिन सावित भयो । सानफ्रानसिस्को वासीले असल सङ्गी गुमाएका छन् । समवेदना दिन चाहन्छु । यस्ता दुखद घटना हुन नदिन र पीडाको यो क्षणलाई घटाउन सानफ्रानसिस्को सहर तपाइहरूसँग मिलेर सबै प्रयास गर्न तयार छ ।”
मङ्गलबार सानमाटियो र अलमेडा काउन्टीमा पनि यसै भाइरसका कारण थप एक एक जनाको मृत्यु भएको छ । उत्तर क्यालिफोर्नियामा मङ्गलबार ६ जनाले ज्यान गुमाए भने दक्षिण क्यालिफोर्नियामा ४ जनाको मृत्यु भएको छ । विस्तृत विवरण चाटमा हेर्न सक्नु हुनेछ ।
प्रतिक्रिया लेख्नुहोस्:-