आगामी चुनावमा एमालेको बहुमत आउँछ : अध्यक्ष ओली

काठमाडौं । नेकपा (एमाले) का अध्यक्ष केपी शर्मा ओलीले आगामी चुनावमा आफ्नो पार्टीको बहुमत आउने दावी गरेका छन् ।

अध्यक्ष ओलीले आइतबार एमाले अर्घाखाँचीले सन्धिखर्कमा आयोजना गरेको मिसन ग्रासरुट कार्यक्रमलाई सम्बोधन गर्दै यस्तो बताएका हुन्।

उनले भने, ‘हामीविरुद्ध घेराबन्दी छ। एमालेले जतिबेला सरकारको नेतृत्व गर्ने मौका पायो, त्यो बेला राम्रो काम गरेकाले अहिले चारैतिरबाट घेराबन्दी गरेका छन्। अब अरु एकातिर एमाले अर्कोतिर भए पनि आउँदो चुनावमा बहुमत सांसद जित्नुपर्छ। सुरुदेखि हालसम्म एमाले सरकारले देशको विकास र समृद्धिमा असाधारण काम गरेको छ।’

एमालेको बढ्दो लोकप्रियता र जनलहरलाई रोक्न प्रतिक्रियावादीले भूमिका खेल्न सक्ने भन्दै उनले त्यसतर्फ सचेत रहन कार्यकर्तालाई निर्देशन दिए। ओलीले भने, ‘अब एमाले बहुमतका साथ उदाउँछ अनि सरकार बनाएर देशको विकास गर्छ। एमालेसँग नीति, भिजन, मिसन, अठोट, संकल्प र देशको माया छ। त्यो अरुमा छैन।’