नागरिकता विधेयकमा सबै दलबीच सहमतिको प्रयास भइरहेको छ : मन्त्री शर्मा

काठमाडौं । सञ्चार तथा सूचना प्रविधिमन्त्री रेखा शर्माले नागरिकता विधेयकमा सबै राजनीतिक दलहरुबीच सहमतिको प्रयास भइरहेको बताएकी छन्।

मन्त्री शर्माले शुक्रवार प्रतिनिधिसभाको बैठकपछि सञ्चारकर्मीहरुसँग कुराकानी गर्दै नागरिकता विधेयकमा राजनीतिक दलहरुका बीचमा सहमतिको प्रयास भइरहेको बताएकी हुन्।

उनले भनिन्, ‘६ महिनाभित्रमा नागरिकता ऐन ल्याउने भन्ने कुरा पहिले पनि भएको हो। अहिले पनि त्यो उल्लेख भएकै विषय छ। नागरिकता ऐन त वास्तवमा ६ महिनाभित्र भन्नाले ६ महिना कुराउनुपर्छ भन्ने कुरा होइन। छिटोभन्दा छिटो ल्याउने कुरा नै हो। त्यसकारण सरकारको प्राथमिकतामा छ।’ उनले नागरिकता विधेयक छिटोभन्दा छिटो ल्याउन सरकारको प्राथमिकतामा परेपनि सहमति खोज्ने प्रयास हुँदा समय लागेको बताइन्।