काठमाडौं । प्रधानमन्त्री एवं नेपाली कांग्रेसका सभापति शेरबहादुर देउवाले केपी ओली शर्मा ओली र उनको पार्टी गणतन्त्र, संघीयताको खिलाफमा भएको बताएका छन् । पाँच दलीय गठबन्धनको चुनावी सभालाई आइतबार पोखरामा सम्बोधन गर्दै उनले यस्तो धारणा ब्यक्त गरेका हुन् ।
‘ओलीको पार्टी र उहाँ स्वयं प्रजातन्त्रको पक्षमा हुनुहुन्न । प्रजातन्त्रको खिलाफको व्यक्ति हो उहाँ । उहाँको अर्कै षड्यन्त्र छ । गणतन्त्रको खिलाफमा, प्रजातन्त्र, संघीयताको खिलाफको व्यक्ति हो उहाँ,’ देउवाले भने, ‘ओलीले जितेपछि के गर्छन् के गर्छन् । भोलि संसद् भंग गर्दिने, पर्सि संसद् चल्न नदिने । एमालेजस्तो अविश्वसनीय पार्टी अन्त कहीँ छैन ।’
प्रधानमन्त्री देउवाले संसद्मा कांग्रेसको विरोध सहन नसकेर ओलीले संसद् भंग गरेको पनि बताए । ‘ओलीको आतंकी शासन कस्तो भने संसद्को विरोध गर्यो भने संसद् नै भंग गरिदिने । संसद् चल्न नदिने । संसदीय व्यवस्था मान्नेखाले पनि होइनन् ओलीजी,’ उनले भने ।
यस्तै उनले कांग्रेसका लागि गठबन्धन सबैभन्दा बढी आवश्यक भएकोले गठबन्धनलाई जोगाउन पनि सबै उम्मेदवारलाई जिताउन आह्वान गरे ।
प्रतिक्रिया लेख्नुहोस्:-