इजरायलमा सुरक्षित नै छौ तर रकेटको बर्षा भइरहेको छ

अर्जुन निर्दोष/ इजरायल ।

इजरायलको आकाशमा युद्धक बिमान, रकेट र आइरन डोमको बिष्फोट देख्न सकिन्छ । इजरायलमा रहेका हामी नेपालीहरु भने अहिले सम्म सुरक्षित छौं। कतिबेला के हुने हो भन्न सकिने अवस्था छैन । यहाँ इजरायल र प्यालेस्टाइनबीच लामो समय देखि द्वन्द्व चलिरहेको छ । प्यालेस्टाइनले दैनिक रकेट आक्रमण गर्ने गरेको छ । मध्यपूर्वको गाजास्थित सीमा क्षेत्रबाट एकसातामा करिव ३ हजार बढी रकेटहरु प्यालेस्टाइनले प्रहार गरिसकेका छन् । प्यालेस्टाइनमा रहेका हमाद आतंकवादीको यो अचाक्ली विरुद्ध इजरायलले कारबाही थाले पछि तनावपूर्ण स्थिति सृजना भएको छ ।

अहिले सम्म गैर आवासीय नेपालीहरु सुरक्षित नै छन् । इजरायल प्रबिधिमा अगाडी छ । प्यालेस्टाइनले प्रहार गरेका रकेटहरु आकासमै ध्वस्त गर्न सक्ने क्षमता इजरायलसँग छ । ९० प्रतिशत रकेटहरु आकासमै ध्वस्त हुन्छन् । केही मात्रामा जमिन र भवनहरुमा झर्ने गरेकाछन् । यस क्रममा हालै एक जना भारतीय कामदारको ज्यान गएको छ । यहाँका घरहरुमा रकेटले असर नगर्ने बंकर र कोठाहरु बनाएको हुन्छ ।
इजरायलमा कार्यरत नेपालीहरु प्राय घरमै स्याहार सुहारको काममा हुन्छन् । तसर्थ पनि धेरै असर परेको छैन । यहाँ रकेट, गोलाबारुद प्रहार हुनु कुनै नौलो घटना होइन । पहिला देखि नै यस्ता घटना घट्दै आएकाछन् । सन् २००८, २०१४ पछि अहिले ठुलो आक्रमण भैरहेको छ ।
इजरायलले त्यसको सामना गरिरहेको छ । आफ्नो तर्फ क्षती हुनबाट जोगाइरहेको छ । इजरायलमा वस्ने हामी नेपालीहरु र दुतावाससँग निरन्तर सम्पर्कमा छौं । कसैलाई पनि अफ्ठेरो परेको खवर छैन । कुनै समस्या आइपरे सम्पर्क गर्न भनेका छौं । नेपाल र विश्वभर छरिएर रहनु भएका नेपाली र आफन्तहरुले इजरायलमा कार्यरत हामीहरुको बारेमा धेरै चासो र चिन्ता लिनु भएको छ । त्यसका लागि हामी आभारी छौ ।

इजरायलमा नेपालीहरु कतिको संख्यामा छन् र कस्तो काममा ब्यस्त छन् भन्ने धेरैको चासो देखिन्छ ।
यहाँ नेपालीहरु दुई वटा कामका लागि मात्रै आउन पाउँछन् । एक थरी यहाँका वृद्धवृद्धा, अपाङ्ग, अशक्त, अरुको साहारा चाहिने व्यक्तिहरुको रेखदेख र स्याहार सुहार गर्ने काममा आउँछन् । अर्काथरी कृषि क्षेत्रमा काम सिक्न सिमित अबधि ११ महिनाका लागि विद्यार्थीहरु आउने गर्दछन् । स्याहार सुहारमा करिब पाँच हजार नेपालीहरु कार्यरत छन् भने ६ सय भन्दा बढी विद्यार्थीहरु कृषि क्षेत्रमा छन् । त्यो बाहेक केही नेपालीहरु भारत हुँदै आएका भेटिन्छन् त केही गैर कानुनी रुपमा बसेका भेटिन्छन् ।

लिगल रुपले बसेका धेरै जसो नेपालीहरु सम्पर्कमा छन् । अहिले सम्म उनिहरुलाई काममा अफ्ठेरो परेको वा द्वन्द्वले प्रभाव पारेको देखिदैन । कुनै ठाउँमा संकट नै पर्न लाग्यो भने पनि अगाडी नै साइरन बज्छ । साइरन बजेपछि सुरक्षित स्थानहरु बनाएका हुन्छन् , त्यहाँ गएर सुरक्षित हुन सकिन्छ । दुतावासले पनि साइरन बज्नासाथ सुरक्षित स्थानमा जान भनेको छ । हामीले पनि सुसुचित गर्दै आएका छौं ।

त्यहाँ कृषि क्षेत्रमा सिप बिकास गर्न आएका नेपाली विद्यार्थीहरु करिब ६ सयको हाराहारीमा छन् ।
नेपाल सरकार र यहाँको सरकारको सम्झौता अनुसार ‘सिक र कमाउ’ परियोजना छ । त्यो भिसामा आएका विद्यार्थीहरु यहाँ ११ महिना बस्न पाउँछन् । ११ महिना पछि स्वदेश फर्केर यहाँ सिकेको आधुनिक कृषि प्रविधिलाई प्रयोग गरेर व्यवसायिक खेती गर्ने हो । कतिपयले यहाँ सिकेको सिप नेपाल फर्किए पछि कृषि व्यवसाय प्रयोग गरिरहेका छन् ।

अहिले नेपाली विद्यार्थीहरु ६ वटा कलेजमा छन् । उनिहरुलाई कलेजले स्थापना गरेको कृषि फर्ममा बस्ने खाने व्यवस्था गरेको हुन्छ । दुई वटा कलेजमा बंकर सहितको व्यवस्था हुन्छ । केहीमा त्यो व्यवस्था नहुन सक्छ तर नजिकै त्यस्ता सुरक्षित स्थानहरु बनाएका हुन्छन् । अहिले सम्म त्यस्तो अप्रिय घटनाहरु घटेका छैनन् । अस्ती मात्रै नेपाली विद्यार्थीहरु बस्ने नजिकै रकेट खसेको रहेछ । उनिहरु डराएका थिए । केही ठुलै समस्या परे सम्पर्क गर्न भनेका छौं । हाल सम्म सुरक्षीत नै छन् ।

यसरी कृषि पढ्न, सिक्न आएका विद्यार्थीले ११ महिना मात्रै बस्न पाउछन् तर अहिले उनिहरुको अबधि सकिएको छ । कोरोना भाइरसका कारण यहाँको अन्तराष्ट्रिय उडान बन्द छ उनिहरु फर्किन पाएका छैनन् । इजरायल सरकारले कोरोनाको महामारीका कारण ती विद्यार्थीहरुलाई केही समय बस्न पाउने व्यवस्था गरेको छ । उनिहरु काम गरेर बस्ने व्यवस्था छ । नेपालमा भुकम्प आउदा पनि यहाँ पढ्ने विद्यार्थीहरुलाई एक वर्ष काम गरेर बस्न दिईएको थियो । हाल विद्यार्थीहरुलाई त्यस्तो समस्या छैन ।

प्यालेस्टाइनसँगको टकरावका कारण नेपालमा पनि विभिन्न त्रास फैलिने खालका समाचार आएकाछन् । यहाँ त्यस्तो त्रास र समस्या केही पनि छैन । यहाँ बस्ने नेपालीहरुका आफन्तलाई नडराउन अनुरोध गर्दछु । अहिले सम्म अवस्था सामान्य नै छ । सम्पूर्ण आप्रवासी नेपालीहरु सुरक्षित छौं ।

(अर्जुन निर्दोष अहिले इजरायलमा हुनुहुन्छ ।)