कोरोनाको ८ करोड डोज भ्याक्सिन अमेरिकाले अरु राष्ट्रलाई दिदै

अमेरिका । कोरोना भाइरसको महामारीसँग जुधिरहेका राष्ट्रहरुलाई सहयोग गर्न अमेरिकाले आठ करोड डोज भ्याक्सिन उपलब्ध गराउने निर्णय गरेसँगै विश्वभरका मुलुकहरु अधिकतम भ्याक्सीन आफ्नो राष्ट्रमा दिलाउनका लागिपरेका छन् । अमेरिकाका राष्ट्रपति जो बाइडेन र प्रशासनसँग विभिन्न राष्ट्रका प्रमुखहरुले कुरा गर्दै आफ्नो मुलुकको अवस्था र भ्याक्सिनको मागको विषयमा कुरा राख्ने गरेका छन् ।
समाचार एजेन्सिहरुका अनुसार पछिल्लो समय महामारीको सवै भन्दा बढि भार खेपिरहेका भारत र ब्राजिलको मात्र होइन अफगानस्तान, बंगलादेश, पाकिस्तान, श्रीलंका लगायतका मुलुकले अनुदान र खरिद दुवै सहयोग माग गरिरहेका छन् । यी देशका लाखौ नागरिकहरुले समेत भ्याक्सिन उपलब्ध गराइदिन हस्ताक्षर गर्दै अमेरिकी नियोगहरुमा सहयोग अपिल गरेका छन् । दवावका वीच बाइडेन प्रशासनले बिकासन्मुख मुलुकहरुलाई सहयोग स्वरुप प्रदान गर्ने भ्याक्सिन कुन आधारमा बितरण गर्ने भन्ने योजना बनाइरहेको छ ।
अमेरिकाले एस्ट्राजेनिकले उत्पादन गरेको ६ करोड डोज, मोर्डोना, फाइजर र जोनसन एण्ड जोन्सनले उत्पादन गरेको २ करोड डोज गरि तत्काल ८ करोड डोज अरु मुलुकलाई सहयोग स्वरुप दिन लागेको हो । कतिपय मुलुकलाई कोरोना विरुद्धको भ्याक्सिन खरिदमा बाटो खुला गर्न बाइडेन प्रशासन सकारात्मक देखिएको छ । नेपाल सरकारले भने अनुदान स्वरुप अमेरिकाले दिने कोरोनाको भ्याक्सिन र थप खरिदका लागि के कस्तो माग गरेको छ भन्ने सार्वजनिक भएको छैन ।

एजेन्सीहरुको सहयोगमा