अमेरिका । कोरोना भाइरसको महामारीसँग जुधिरहेका राष्ट्रहरुलाई सहयोग गर्ने प्रतिवद्धता अनुसार अमेरिकाले नेपाल लगायत एशियाका केही राष्टहरुलाई तत्काल ७० लाख डोज खोप उपलब्ध गराउन लागेको छ । विश्वभर आठ करोड डोज खोप उपलब्ध गराउने अमेरिकाले निर्णय गरिसकेको छ ।
अमेरिकाका कम्पनीहरुले निर्माण गरेका कोरोना भाइरस बिरुद्ध प्रभावकारी देखिएका खोप नेपाल लगायत एशियाका राष्ट्रहरुले कति–कति संख्यामा प्राप्त गर्ने हुन् भन्ने चाही अझै सार्वजनिक भएको छैन । कोरोनाको खोप प्राप्त गर्ने एशियाका मुलुकहरुको सूचिमा नेपालको नाम भने समावेस भइसकेको छ ।
अमेरिकाले एस्ट्राजेनिकले उत्पादन गरेको ६ करोड डोज, मोर्डोना, फाइजर र जोनसन एण्ड जोन्सनले उत्पादन गरेको २ करोड डोज गरि तत्काल ८ करोड डोज अरु मुलुकलाई सहयोग स्वरुप दिन लागेको हो । कतिपय मुलुकलाई कोरोना विरुद्धको भ्याक्सिन खरिदमा बाटो खुला गर्न बाइडेन प्रशासन सकारात्मक देखिएको छ ।
अमेरिका भित्र कोरोना भाइरस विरुद्धको खोप सहजै उपलब्ध छ । तर थुप्रै अमेरिकन र आप्रवासीहरुले खोप लगाउन रुचि देखाएका छैनन् । खोपको ब्यापकता र प्रभावकारिताले संक्रमण दर घट्दो अवस्थामा देखिए पनि खोप लगाउनै नचाहने समुह अमेरिकाको लागि चुनौति भएको छ । तिनीहरुलाई खोप प्रति आकर्षित गराउन अमेरिकाका कतिपय काउन्टी र राज्यले खोप लगाउन आउनेहरुलाई गिफ्ट कार्ड, पैसा दिने, वियर, खाद्यन्न लगायत विभिन्न उपहार साथै आकर्षक सुविधा समेत प्रदान गरेका छन् । विडम्वना नै भन्नु पर्छ विश्वका लाखौ मानिसहरु अमेरिकासँग यही खोपको माग गर्दै हस्ताक्षर गरिरहेका छन् ।
एशियाका मात्र होइन विश्वभरका मुलुकहरु अधिकतम भ्याक्सीन आफ्नो राष्ट्रमा दिलाउनका लागिपरेका छन् । समाचार एजेन्सिहरुका अनुसार पछिल्लो समय महामारीको सवै भन्दा बढि भार खेपिरहेका भारत र ब्राजिलको मात्र होइन अफगानस्तान, बंगलादेश, पाकिस्तान, श्रीलंका लगायतका मुलुकले अनुदान र खरिद दुवै सहयोग माग गरिरहेका छन् । यी देशका लाखौ नागरिकहरुले समेत भ्याक्सिन उपलब्ध गराइदिन हस्ताक्षर गर्दै अमेरिकी नियोगहरुमा सहयोग अपिल गरेका छन् । दवावका वीच बाइडेन प्रशासनले बिकासन्मुख मुलुकहरुलाई सहयोग स्वरुप पहिलो चरणमा प्रदान गर्ने भ्याक्सिनको संख्या र क्षेत्र भने तय गरेको छ ।
एजेन्सीहरुको सहयोगमा
प्रतिक्रिया लेख्नुहोस्:-