अहिले कांग्रेस सरकारमा जाँदैन : शेखर कोइराला

काठमाडौं । नेपाली कांग्रेसका नेता डा. शेखर कोइरालाले आफ्नो पार्टी जस्तोसुकै गरेर पनि सरकारमा जाने कुनै पनि तयारीमा नभएको बताएका छन् ।

उनले आज राजधानी काठमाडौंमा नेपाल वित्तीय संस्था कर्मचारी संघ, नेपाल बैंक लिमिटेडको दशौँ केन्द्रीय महाधिवेशनको उद्घाटन कार्यक्रममा बोल्दै यस्तो बताएका हुन् ।

नेता कोइरालाले दल फुटाउने र व्यक्तिलाई दुख दिने काम गरेर अघि बढ्ने हो भने कही पनि पुग्न नसकिने बताए । साथै उनले, जबसम्म सुशासन र पारदर्शीका साथै भ्रष्टाचारको कुरा छिनोफानो गरेर अघि जान नसके देशमा आर्थिक विकास हुन नसक्ने बताए । “यो कुरालाई नेपाली कांग्रेसले गम्भीर विषय लिएको छ । अन्य दलसँग पनि छलफल अघि बढाइरहेको छौँ,” उनले भने ।