फिफा विश्वकप २०१८ को चौधौं दिन आज भएको समूह ‘एच’को खेलमा जापान पोल्याण्डसंग हारेर पनि भाग्यले बराबरी अंक र बराबरी गोल स्कोर भएको सेनेगलसंग फेयरप्ले रेकर्डका आधारमा सेनेगललाई उछिन्दै दोश्रो चरण प्रवेश गरेको छ। समूह उप-बिजेता हुँदै ‘राउण्ड-अफ-१६’ मा पुगेको एक्लो एशियन मुलुक जापानले समूह एफको बिजेतासंग खेल्ने छ। जापान यो पटक समेत गरेर तीन पटक राउण्ड अफ १६ मा प्रवेश गरेको विश्वकप इतिहास छ। सन् १९९८ मा पहिलो पटक फिफा विश्वकपमा सहभागी हुन पाएको जापान अहिलेसम्म दोश्रो चरण भन्दा अगाडिको यात्रा तय गर्न सक्षम भएको छैन। नक-आउट चरणमा ईंगल्याण्ड वा बेल्जियम मध्ये एकसंग खेल्ने निश्चित भएको जापानले त्यहाँ जीत हासिल गर्न सक्यो भने पहिलो पटक क्वार्टर फाइनलको यात्रा तय गर्नेछ। विश्वकप फुटबलमा यस अघि दक्षिण कोरियाले मात्र एशियाबाट सेमी-फाइनलसम्म पुग्ने इतिहास बनाएको छ।
उता आजै भएको समूह ‘एच’ कै अर्को खेलमा कोलम्बियाले सेनेगललाई १-० गोलले हराउँदै दोश्रो चरण प्रवेश निश्चित गरेको छ। दुई खेलबाट ४ अंक बटुलेको यस समूहका पोल्याण्ड बाहेक जापान, सेनेगल र कोलम्बिया तीनवटै देशको दोश्रो चरण जाने सम्भावना कायम नै थियो। सेनेगलको आजको हारसंगै अफ्रिकाबाट सहभागी पाँचवटै देशहरु पहिलो चरण अर्थात ग्रुप स्टेजबाटै बाहिरिएका छन्। जापानसंग बराबरी ४ अंक, बराबर गोल स्कोर भएपनि टिमले पाएको पहेंलो कार्डका आधारमा जापान दोश्रो चरण जान सफल भएको हो।
तस्वीर: फिफा
प्रतिक्रिया लेख्नुहोस्:-