अमेरिका, जुलाई ६,२०१८
जारी विश्वकपको दोश्रो क्वार्टर फाइनल खेलमा बेल्जियमले ब्राजिललाई पराजित गरेको छ। ब्राजिलियन खेलाडी फर्नान्डिन्होले कर्नर किकलाई क्लियर गर्ने प्रयास गर्दा आफ्नै गोलपोष्टमा आत्मघाती गोल हुन पुग्यो र खेलको १३ औं मिनेट मै बेल्जियमले १-० गोलको अग्रता बनाउन सक्यो। आत्मघाती गोलसंगै दबावमा आएको ब्राजिलले पहिलो हाफमा गोलगर्ने केही राम्रा अबसरहरु सदुपयोग गर्न सकेन। नेयमारले प्रहार गरेको कर्नर किकलाई टि-सिल्भाले पोष्ट प्रहार गरेपनि दुर्भाग्यवस साइडबारमा लागेर फर्कियो। पौलिन्होको पोष्ट प्रहार पनि बेल्जियन किपरले रोकिदिए।
खेलको ३१ औं मिनेटमा बेल्जियन स्टार स्ट्राइकर रोमेलु लुकाकुले मैदानको मध्यभागदेखि नै एक्लै बल नियन्त्रण गर्दै अघि बढाउँदै दिएको पासलाई डि ब्रुएन (जर्सी नं ७) ले सहज गोलमा परिणत गरिदिए र बेल्जियमलाई हाफटाइम अगाडि नै २-० गोलको अग्रता दिलाए।
रेनाटो अगस्टोले (जर्सी नं ८) ७६ औं मिनेटमा हेडरबाट गोल गरेर ब्राजिललाई खेलमा फर्काउन मद्दत गरे। तर त्यसपछि निकै आक्रामक रुपमा खेलेको ब्राजिलले हार टार्न सकेन र २-१ गोलले बेल्जियमसंग हार्न बाध्य भयो। फर्नान्डिन्होको आत्मघाती गोलका कारण ब्राजिल नियमित समयमा हार्न पुग्यो। अन्यथा खेल अतिरिक्त समयमा जाने संभावना रहन्थ्यो र ब्राजिल खेलमा फर्कने सम्भावना समेत रहन्थ्यो।
आजको हारसंगै छ पटक विश्वकप उचाल्ने अवसर ब्राजिलको लागि हुने छैन। बेल्जियमका लागि ब्राजिल जस्तो विश्व फुटबलको सदाबहार अब्बल टिमलाई हराएर सेमी-फाइनलसम्न पुग्नु नै ठूलो सफलता हो। सेमी-फाइनलमा फ्रान्सलाई हरायो भने बेल्जियमका लागि सबभन्दा ठूलो सफलता हुनेछ। बेल्जियम अब विश्व च्याम्पियनको दौडमा दुई खेल मात्र टाढा छ।
तस्वीर: फिफा
प्रतिक्रिया लेख्नुहोस्:-