बद्रि गौतम, दूरबिन नेपाल, न्युयोर्क
कोरोना भाइरसको संक्रमणमा कमी आएसंगै आप्रवासी सहर न्युयोर्कमा अपराधको घटनामा भने निकै बृृद्धि भएको छ । न्युयोर्कमा हरेक दिन गोली चलेका, मानिसहरु लुटिएका तथा छुरा प्रहारका घटनाहरु बढिरहेका छन । यसै बर्षको जुन महिनामा मात्र बन्दुक हिंसा अघिल्लो बर्षको तुलनामा १३० प्रतिशतले बढेको एनवाइपीडी अर्थात न्युयोर्क प्रहरी विभागले जनाएको छ । त्यसैगरी गोली प्रहारबाट मृत्यु हुनेको संख्यामा पनि उत्तिकै बृद्धि भएको छ । गोली प्रहारबाट जुन महिनामा ३९ जनाको ज्यान गएको छ । अघिल्लो बर्ष सोही महिनामा ३० जनाको ज्यान गएको थियो । न्युयोर्क सहरका चारवटै बोरोहरुमा गोली प्रहार लगायतका अपराधका घटना बढेका छन । अघिल्लो बर्ष अर्थात सन २०१९ मा जुन महिनामा ८९ वटा गोली प्रहारका घटना भएका थिए भने यो बर्षको जुन महिनामा मात्र २०५ वटा गोली प्रहारका घटना भएको प्रहरीले जनाएको छ । पछिल्लो बन्दुक हिंसामा भएको बृद्धि १५ बर्षमै सबैभन्दा धेरै रहेको बताइएको छ । बन्दुक हिंसामा २ हजार आरोपीहरु पक्राउ गरिएको प्रहरीले जनाएको छ ।
चोरीका घटना ११८ प्रतिशतले बढे
न्युयोर्क सहरमा हत्या अपराधमात्र होइन चोरीका घटनाहरुपनि निकै बढेका छन । जुन महिनामा न्युयोर्क प्रहरीले सार्वजनिक गरेको प्रतिवेदन अनुसार एक महिनाको अवधिमा एक हजार सात सय ८३ चोरीका घटना भएका छन । अघिल्लो बर्ष चोरीका घटना ८ सय १७ थिए । जुन यस बर्षभन्दा ११८ प्रतिशतले कमी हो । त्यसैगरि गाडी चोरीका घटनामा पनि ५१ प्रतिशतले बढेको छ । अघिल्लो बर्ष न्युयोर्कमा चार सय ६२ गाडी चोरी भएका थिए भने यो बर्षको जुन महिनामा ६ सय ९६गाडी चोरीएका छन ।
तर अघिल्लो बर्षको तुलनामा विभिन्न अपराधमा पक्राउ पर्नेहरुको संख्यामा भने निैकै कमी आएको प्रहरीको रिपोर्टमा उल्लेख छ । प्रहरीका अनुसार अघिल्लो बर्ष भन्दा यसबर्ष ४० हजार कम पक्राउ गरिएको छ । प्रहरीले पक्राउ परिसकेका मानिसहरुलाई कानुनी कारवाही पछि त्यतिकै नछोडी उनीहरुको व्यवस्थापन गरेकोले दोहोर्याएर अपराध गर्नेको संख्या घटेका कारण पक्राउपनि कम भएको प्रहरीको अनुमान छ । अघल्लिो बर्ष बन्दुक हिंशामा एक हजार ६ सय ८३ जना पक्राउ परेका थिए भने यो बर्ष जुन ५ सम्म एक हजार ६ सय ७९ जनालाई पक्राउ गरिएको छ ।
जुन महिनामा बलात्कार र घृणाजन्य अपराध घटे तर समग्र हत्याका घटना बढे
प्रहरीका अनुसार न्युयोर्कमा जुन महिनामा बलात्कारका घटना अघिल्लो बर्षको तुलनामा २१ प्रतिशतले कमी देखिएको छ । अघिल्लो बर्षको जुन महिनामा मात्रै एक सय ३८ वटा बलात्कारका घटना रिपोर्टमा आएका थिए भने यो बर्ष घटेर एक सय नौ घटना दर्ता भएका छन । प्रहरीका अनुसार कतिपय बलात्कारका घटनाहरु सार्वजनिक नभएका हुन सक्छन । त्यसैगरी घृणाजन्य अपराधमा पनि अघिल्लो बर्षभन्दा ३८ प्रतिशतले कमी देखिएको छ । प्रहरीका अनुसार जुन महिना सम्म अघिल्लो बर्ष घृणा अपराधका दुइ सय १२ घटना भएका थिए भने यो बर्ष एक सय एक सय ३४ घृणा अपराधका घटनाका उजुरी परेका छन । तर पहिलो ६ महिनामा हत्याका घटनामा भने बृद्धि भएका छन । अघिल्लो बर्ष पहिलो ६ महिनामा एक सय ४७ हत्याका घटना भएका थिए भने यो बर्ष एक सय ८१ हत्याका घटना भएका छन। जुन अघिल्लो बर्षको तुलनामा २३ दशमलव एक प्रतिशतले बढि हो ।
न्युयोर्क प्रहरी राज्य तथा सिटीसंग असन्तुष्ट
न्युयोर्क सिटीमा प्रहरी र मेयरको विचको विवाद निकै पहिले देखिको हो । यसबेला भने प्रहरी प्रशासन र मेयर कार्यालय विचको बैमनष्यता सतहमै देखिएको छ । पछिल्लो समय मिनेसोटामा अश्वेत नागरिक जर्ज फ्लोइडको हत्यापछि सडकमा विरोध बढन थालेपछि न्युयोर्कका मेयर बिल डे ब्लाजियोले प्रहरीको बजेट कटौतीको घोषणा गरेका थिए । त्यसमा प्रहरी प्रशासनले असन्तुष्टि जनाएको थियो । सिटीबाट न्युयोर्क प्रहरीको बजेट कटौती तथा प्रहरीको अधिकारामथी बन्देज लगाउनु तथा विश्वव्यापी महामारीका विचमा काम गर्नु प्रहरीका लागि निकै चुनौतीपुर्ण रहेको अभिव्यक्ति न्युयोर्क प्रहरीका आयुक्त डर्मोट शियाले दिएका छन । उनले न्युयोर्कमा बढेको बन्दुक हिंसामा निर्दोष मानिसहरु धेरै प्रभावित हुने भएकोले विभिन्न चुनौतीहरुका विचपनि प्रहरीले गम्भिरतापुर्वक लिएको कमीसनर शियाले बताएका छन ।
पछिल्लो ६ महिनामा कोरोना भाइरसका कारण मानिसहरुमा पर्न गएको नकारात्मकता तथा विरत्तताका कारणपनि अपराधका घटनामा बृद्धि भइरहेको अनुमान गरिएको छ । त्यसैगरि अघिल्लो महिना मिनेपोलिसमा जर्ज फ्लोइडको हत्यापछि हिंशा भडकिएपछि अपराधका घटना बढ्दै गएका छन भने प्रहरीको मनोवलपनि गिर्दै गएको अनुमान गरिइएको छ । न्युयोर्कको ब्रुकलिन र ब्रंक्समा बन्दुक हिंशा लगायतका घटनामा बृद्धि हुन थालेपछि सो क्षेत्रका स्थानीय समुदायपनि चिन्तित बनेका छन ।
प्रतिक्रिया लेख्नुहोस्:-