स्याक्रामेन्टो, क्यालिफोर्निया । क्यालिफोर्नियाका गभर्नर गेभिन न्युसमले आम मानिस र ब्यबसायीहरुलाई पानीको प्रयोगमा १५ प्रतिशत कटौती गर्न आग्रह गरेका छन् । बढ्दो गर्मी र सुख्खाका कारण जमिन मनीको पानी र प्राकृतिक स्रोतहरू सुक्दै गएपछि गभर्नर न्युसमले यस्तो आग्रह गरेका हुन् । अमेरिकाको सबै भन्दा बढी जनसङ्ख्या भएको राज्य क्यालिफोर्नियालाई खडेरीले च्याप्दै लगेका कारण उपभोक्तहरुले स्वेच्छाले नै १५ प्रतिशत पानीको प्रयोग कम गरेमा केही राहत मिल्ने उनको भनाई छ ।
न्युसमको अनुरोधले क्यालिफोर्निया पानीको थप अभावले छिटै तड्पिने प्रस्ट गर्छ । गर्मी समयमा हरेक वर्ष क्यालिफोर्नियामा पानी व्यवस्थापन थप चुनौतीको रूपमा देखा पर्दै गएको छ । यो साता क्यालिफोर्नियाका धेरै भागमा तापक्रम अत्यधिक वृद्धि भएर कतिपय ठाउँमा तातो हावा पनि चल्ने पूर्व अनुमान गरिएको छ ।
गर्मीका कारण एक महिना बिचमा उत्तर पश्चिमी अमेरिकामा १०० जना भन्दा बढीको ज्यान गइसकेको छ । उत्तर क्यालिफोर्निया र ओरेगन राज्यका कतिपय भेगमा एसी नभएका घरहरूमा बसेका मानिसहरू अत्यधिक गर्मीका कारण मृत्यु वरण गरेको बताइएको छ ।
न्यूसमले खडेरीको आपत्कालीन अवस्थाको घोषणामा नौ वटा काउन्टीहरू थप गरेका छन् । योसँगै क्यालिफोर्नियाका ५८ मध्ये ५० वटा काउन्टी सुख्खा ग्रस्त घोषित भएका छन् । लस एन्जलस, सान डिएगो र सानफ्रानसिस्को जस्ता ठुला सहर भने आपतकालिन सूचिमा राखिएको छैन ।
एजेन्सीहरुको सहयोगमा
तस्वीर सीएनएन
प्रतिक्रिया लेख्नुहोस्:-