अमेरिका । अमेरिकामा कोरोना भाइरसको नयाँ भेरियन्ट डेल्टाको सङ्क्रमण तीव्र रूपमा बढिरहेको अध्ययनहरूले देखाइरहेका छन् । अमेरिकाका विभिन्न राज्यमा कोरोना संक्रमितहरुको सङ्ख्यामा भएको वृद्धि चुनौतीको रूपमा आएको स्वास्थ्य विज्ञहरूले बताएका छन् ।
समाचार एजेन्सीहरूका अनुसार अमेरिकाको दोस्रो ठुलो सहर लस एन्जलसमा पछिल्लो २ सातामा कोरोना संक्रमितको सङ्ख्या ३ सय प्रतिशतले वृद्धि भएको छ । संक्रमितको संख्यासँगै अस्पताल भर्ना हुने बिरामीको सङ्ख्या पनि थपिएको छ । डेल्टा भेरियन्टबाट संक्रमितहरुमा करिब ८० प्रतिशत खोप नलगाउने समूहका मानिसहरू रहेका छन् । कोरोना भाइरसको खोप लगाउने समूहमा केही मात्रामा सङ्क्रमण देखिए पनि गंभिर स्वास्थ्य समस्या भने देखिएको छैन ।
जोन्स हप्किन्स विश्व विद्यालयका अनुसार विश्वभर करिब १९ करोड मानिसमा कोरोना भाइरसको सङ्क्रमण देखिएको छ । यही भाइरसका कारण ४० लाख ६५ हजार मानिसले ज्यान गुमाइसकेका छन् । नयाँ नयाँ भेरियन्ट विश्व समुदायका लागि नयाँ चुनौतीका रूपमा आएको छ ।
प्रतिक्रिया लेख्नुहोस्:-