काठमाडौँ । नेपाल कम्युनिस्ट पार्टी एमालेले विपक्षी गठबन्धनलाई सहयोग गर्ने २२ जना सांसदलाई स्पष्टीकरण सोधेको छ । प्रतिनिधि सभामा प्रधानमन्त्री शेर बहादुर देउवालाई विश्वासको मत दिएपछि आक्रोशित भएका अध्यक्ष केपी ओली र उनको समूहको बैठकले २२ सांसदलाई कारबाही गर्न प्रक्रिया थाल्ने निर्णय गरेपछि स्पष्टीकरण सोधिएको हो । तर स्पष्टीकरण पत्रमा किन मत दिएको भनी सिधै सोधिएको छैन । संसदीय दल र पार्टी निर्णय विपरीत विपक्षी गठबन्धनलाई सहयोग गरेर दलीय अनुशासन उल्लङ्घन गरेको आरोप लगाइएको छ । गुटबन्दी गरेको, षडयन्त्र गरेको पार्टी निर्णयको बारम्बार उल्लङ्घन गरेको भनिएको छ । अनुशासनहीन, अराजक, अनैतिक र अलोकतान्त्रिक काम गरेको पत्रमा उल्लेख छ ।
२४ घण्टा भित्र चित्त बुझ्दो प्रष्टीकरण नदिएमा पार्टीको जिम्मेवारीबाट मुक्त गर्दै साधारण सदस्य समेत नरहने गरी कारबाही गर्ने पत्रमा उल्लेख छ । २२ जना सांसदहरूले भने यसलाई खासै महत्त्व दिएका छैनन् । उनीहरूले अध्यक्ष ओलीले नै संविधान विपरीत पटक पटक संसद् विघटन गरेको, पार्टी अनुशासन उल्लङ्घन गर्दै जाँदा अहिलेको अवस्था सिर्जन भएको बताएका छन् । उनीहरूले अध्यक्ष ओलीसँग स्पष्टीकरण सोध्ने नैतिकता समेत बाकी नरहेको अभिव्यक्ति दिएका छन् ।
प्रतिक्रिया लेख्नुहोस्:-