अमेरिका, अगष्ट १४,
गैर-आवासीय नेपाली संघ, राष्ट्रिय समन्वय परिषद अमेरिकाले अमेरिकास्थित अन्य नेपाली संघ-संस्थाहरु समेतको सहकार्यमा आज न्युयोर्कमा रहेको नेपाली महाबाणिज्य दूतावास मार्फत नेपाल सरकारलाई गैर-आवासीय नेपाली नागरिकताका सम्बन्धमा एक ज्ञापन पत्र हस्तान्तरण गरेको छ। गैर-आवासीय नेपाली संघ, अमेरिकाका महासचिव बाबु राम लामाले ज्ञापनपत्र पढेर सुनाएका थिए। एनआरएनए अमेरिकाले ज्ञापनपत्र मार्फत नेपाल सरकारले नेपाली नागरिकता ऐन संशोधनका लागि संसदमा दर्ता गरेको विधेयकमा नेपालको संबिधान २०७२ को भाग २ को दफा १४ मा गरेको गैर-आवासीय नेपाली नागरिकता सम्बन्धि व्यवस्थाको मर्म विपरित नागरिकता ऐन संशोधन हुन लागेकोले सरकारको ध्यानाकर्षण गराएको छ। हाल संसदको राज्य व्यवस्था तथा सुशासन समितिमा विचाराधीन रहेको प्रस्तावित विधेयकमा संबिधानमा उल्लेख भएको भन्दा भिन्न प्रकारले ब्याख्या भएकोले गैर-आवासीय नेपाली नागरिकताका सम्वन्धमा सम्बोधन गरिनु पर्ने बुंदाहरु उल्लेख गरि ज्ञाप पत्र बुझाईएको एनआरएनए अमेरिकाले जनाएको छ।
ज्ञापनपत्र एनआरएनए-आइसीसीको अमेरिका क्षेत्रका क्षेत्रीय उप-संयोजक नबिन शेरचन र एनआरएनए अमेरिकाका पूर्व अध्यक्ष खगेन्द्र जिसीले संयुक्त रुपमा हस्तान्तरण गरेका थिए। ज्ञापनपत्र बुझाउने कार्यक्रममा नेपाली जनसम्पर्क अन्तराष्ट्रिय समन्वय समितिका बिष्णु सुबेदी, प्रवासी नेपाली मंचकी सिता खरेल लगाएतका व्यक्तिहरुको सहभागिता रहेको एनआरएनए अमेरिकाले जनाएको छ।
प्रतिक्रिया लेख्नुहोस्:-