काठमाडौं । प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल प्रचण्डले जनार्दन शर्माले पार्टी फुटाउँछन् भन्ने हल्ला निराधार रहेको प्रष्टीकरण दिएका छन् ।
पार्टी कार्यालय पेरिसडाँडामा सञ्चारकर्मीलाई संक्षिप्त प्रतिक्रिया दिँदै उनले उपमहासचिव जनार्दन शर्माले पार्टी फुटाउन लागेको भनेर गलत प्रचार गरिएको दाबी गरे। बरू स्थायी समिति बैठकअघिसम्म रहेका कतिपय भ्रम चिरिएको उनले बताए।
माओवादी केन्द्रको साउन २५ देखि २९ सम्म बसेको स्थायी समिति बैठकमा उपमहासचिव शर्माले १२ पृष्ठको पार्टी निर्माणसम्बन्धी र २ पृष्ठको अध्यक्ष प्रचण्डप्रति लक्षित लिखित प्रस्ताव पेस गरेका थिए।
शर्माको प्रस्तावमा अध्यक्ष प्रचण्डलाई नेतृत्व छाड्न आग्रह गरिएको थियो। यसले माओवादीभित्र नयाँ अन्तरसंघर्ष चलेको चर्चा भइरहँदा अध्यक्ष प्रचण्डले ती सबै समाधान भएको ठोकुवा गरेका हुन्।
प्रतिक्रिया लेख्नुहोस्:-