दूरबिन नेपाल
अमेरिकी राष्ट्रपति डोनल्ड ट्रम्पले अमेरिकामा जन्मिदासाथ यहांको नागरिक हुने संबैधानिक प्रथाको अन्त्यको खोजी गम्भिर रुपले गरिरहेको बताएका छन । ह्वाइट हाउस बाहिर दक्षिणी लानमा सञ्चारकर्मीहरुसंग कुरा गर्दै राष्ट्रपति ट्रम्पले जन्मसिद्ध नागरिकताको नियमविरुद्ध कडा रुपमा प्रस्तुत हुंदै आफुले निकै गम्भिररुपमा जन्मजात नागरिकताको प्रावधानलाई हेरिरहेको बताए । उनले आफु सिमा पारीबाट आउने हाम्रो(अमेरिकी) भुमीमा बच्चा जन्माउने अनि अमेरिकी नागरिक भएकोमा बधाइलिने प्रथाको अन्त्यको लागि ह्वाइट हाउसले गम्भिरतापुर्वक कदम चालिरहेकोपनि खुलासा गरे । राष्ट्रपति ट्रम्पले जन्मसिद्ध नागरिक अधिकारको पहिलेपनि विरोध गरेका थिए । सन २०१८ को मध्यावधि निर्वाचनको पूर्वसन्ध्यामापनि जन्मसिद्ध नागरिक बन्ने प्रथाका अन्त्य गरिने उदघोष गरेका थिए । उनले सो बेला कार्यकारी आदेशद्वारानै जन्मजात नागरिक हुने नियम खारेज गरिने बताएका थिए ।
तर अमेरिकामा जन्मजात नागरिक बन्ने अधिकार राष्ट्रपतिको कार्यकारी आदेशलेपनि खारेज नहुने विष्लेशकहरुले बताएका छन । किनकी अमेरिकी संबिधानको १४ औं संशोधनद्वरा जन्मसिद्ध नागरिकताको ग्यारेण्टी गरेको छ । जसमा स्पष्ट रुपले लेखेको छ कि “संयुक्त राज्य अमेरिकाको क्षेत्राधिकार भित्र जन्मेकाहरु स्वभाविकरुपले अमेरिकी नागरिक हुन” यो संबैधानिक अधिकारलाई कुनैपनि आदेशले खारेज गर्न सक्दैन । राष्ट्रपति ट्रम्पले अमेरिकामात्र यस्तो मुलुक हो जसले जन्मका आधारमा नागरिकता दिन्छ भन्ने दावीपनि गरेका थिए । तर विष्लेशकहरुका अनुसार संसारमा अन्य ३० भन्दा धेरै मुलुकपनि छन जहां आफ्नो भुमिमा जन्मेको आधारमापनि व्यक्तिलाई नागरिक मानिन्छ ।
प्रतिक्रिया लेख्नुहोस्:-