अमेरिका २७ अगष्ट
निलम कार्की निहारिकालाई वर्ष २०७४को मदन पुरस्कार प्रदान गरिने भएको छ । योगमाया पुस्तकका लागि नेपाली साहित्य क्षेत्रमा सर्वाधिक सम्मानित यो पुरस्कार निलम कार्की निहारिकालाई प्रदान गरिएको हो । मदन पुरस्कार गुठीको निर्णलाई पत्रकार तथा गुठीका अध्यक्ष कुन्दा दीक्षितले आफ्नो फेसबुकबाट सार्वजनिक गरेका छन् । गुठीमा प्राप्त २सय ५३ पुस्तक मध्ये कैरन, नथिया, पाठशाला,भुइयाँ, यार, योगमाया,लिम्बुनी गाउँ र हिमाली दर्शन उत्कृष्टमा छनौट भएका थिए । सोमवार बसेको साधारण सभा बैठकले यी मध्येबाट योगमाया पुस्तकका लागि निलम कार्कीलाई मदन पुरस्कार दिने निर्णय गरेको गुठीद्वारा जारी विज्ञप्तिमा उल्लेख गरिएको छ । बाल साहित्य विकास, विस्तार र प्रवर्धनमा पाँच दशक देखि सक्रिय शान्तदास मानन्धरलाई वर्ष २०७४को जगदम्बा श्री प्रदान गरिने दीक्षितले सार्वजनिक गरेका छन् । पाल्पा जिल्लामा जन्मिएर अमेरिकामा बसोबास गर्दै आएकी निलम कार्की निहारिकाले नेपाली साहित्य क्षेत्रमा निरन्तर कलम चलाउँदै आएकी छन् ।उनी पेसाले नर्स हुन् । यस अघि उपन्यास चीरहरणका लागि पद्दमश्री पुरस्कार २०७२ पनि उनले प्राप्त गरिसकेकी छन् ।
तस्बिर: कुन्दा दीक्षितको फेसबुकवालबाट
प्रतिक्रिया लेख्नुहोस्:-