स्यानफ्रान्सिस्को । सेभेन पीक समिटर एवं स्टयाण्ड अप कमेडियन शैली बस्नेतको सम्मानमा बे एरियामा रहेको नेपाली भाषा कक्षा र लेट्स हाइक ग्रुपले शनिवार बिहान ‘शैली बस्नेतसँग मिशन पीक हाइक’ कार्यक्रमको आयोजना गरेको छ । सो हाइकिंग कार्यक्रममा सयौं नेपाली नेपालीहरु सहभागी हुने बताइएको छ । फ्रिमण्टको ओलोनी कलेजबाट शुरु हुने उक्त हाइकिंग मिशन पीकमा पुगेर समापन हुने छ । हाइकिंग लगभग तीन घण्टाको हुने बताइएको छ ।
कार्यक्रमको संयोजन गरेकी भाषा कक्षाका शिक्षिका सावित्री पन्तका अनुसार केही हप्ता अघि शैली बस्नेतले नेपाली भाषा कक्षामा नेपाली बालबालिकाहरुलाई गरेको सम्धबोनको कारण यो कार्यक्रमको आयोजना गरिएको हो । ‘शैलीजीले कसरी सगरमाथााको शिखर चढ्नुभयो अनि कसरी सबै महादेशका अग्ला हिमालहरु चढ्नुभयो भन्ने कुरा सुनाउँदा हाम्रा नानीबाबुहरु एकदमै एक्साइटेड भए त्यसकारण मैले उहाँलाई अनुरोध गरेर एउटा फिल्डट्रिप जस्तो गरौं न भनेर प्रस्ताव गरेकी हुँ, पन्तले भनिन, उहाँले ओके गरेपछि हामी सबै जोडिएका हौं, यो हमी सबैको साझा कार्यक्रम हो’।
पन्तका अनुसार अमेरिकामा रहेका नेपाली बालबालिकाले शैली बस्नेतवाट धेरै कुरा सिक्न र जान्न सक्ने भएकाले पनि बालवालिकालाई थप उत्साहित बनाउन यो हाइकिंगको आयोजना गरिएको हो । विगत ५ वर्षदेखि नियमित जसो मिशन पीक हाइक गर्दै आएकी सावित्री पन्त यस्तो कार्यक्रमले नेपालीहरुलाई नियमित हिँडडुल गर्न सहयोग र प्रेरणा दिने बताउँछिन् ।
नेपाली भाषा कक्षाका प्रिन्सिपल डा. शम्भु घिमिरे पनि शैली बस्नेतसँगको हाइकिंग विशेषतः नेपाली बालवालिकाको लागि सिक्ने अवसर हुने बताउँछन् । ‘शैलीजीसँग नेपाली भाषा कक्षामा बालबालिकाहरुले धेरै प्रश्नहरु सोधे, वास्तवमा उनीहरु शैलीजीलाई आफैं भेट्न र कुराकानी गर्न चाहन्थे, त्यो पुरा हुने भयो’ घिमिरेले दूरविनसँगको कुराकानीमा भने, शैलीजी हामी सबैका लागि प्रेरणाको श्रोत हो ।
आज शुक्रबारसम्म झण्डै तीन सयको हाराहारीमा अभिभावक एवं बालबालिकाले हाईकिंगको लागि इच्छा देखाएको पन्तले बताइन्। आगामी अक्टोवर ८ मा हुने माउण्ट एभरेष्ट डायरिजमा सहभागी हुन सबैलाई आह्वान गर्ने उनले बताइन् । उक्त कमेडी शो को लागि पनि मिशन पीक हाइकिंग प्रभावकारी हुन्छ भन्ने हाम्रो विश्वास छ पन्तले भनिन् ।
यसैवीच, शैली बस्नेतको आगामी अक्टोवर ८ मा हुने माउण्ट एभरेष्ट डायरिज कमेडी शो कार्यक्रमलाई सफल बनाउन बे एरियाका नेपाली समुदाय सकृय भएको छ । ‘पहिलो पटक नेपालीको स्यानफ्रान्सिस्कोमा यस्तो ऐतिहासिक कार्यक्रम हुदैछ, हामीले यसलाई सफल बनाउनपर्छ,’ मदरल्याण्ड नेपालका अध्यक्ष अनिल पाण्डेले भने
प्रतिक्रिया लेख्नुहोस्:-