अमेरिकामा एसियन पूरुषहरुको आम्दानी सबैभन्दा धेरै

बद्रि गौतम, दूरबिन नेपाल
कतिलाई लाग्ला अमेरिकामा सबै भन्दा धेरै आम्दानी स्वेत अमेरिकन तथा गोरा वर्णका पूरुष तथा महिलाहरुको हुन्छ । गोरो छाला हुंदैमा तथा स्वेत अमेरिकन हुंदैमा उनीहरुको आम्दानी पनि उच्च नै हुन्छ भन्ने मानसिकता केहीको हुन सक्ला । तर यथार्थ भने अलि फरक छ । किनकी विभिन्न तथ्यांकले अमेरिकामा बस्ने स्वेत वा अश्वेत भन्दा एसियन मुलका मानिसहरुको आम्दानी उच्च रहेको देखाउछन । विभिन्न वर्ग तथा लिंगको आधारमा वर्ल्ड एटलसले गरेको अनुसन्धानबाट एसियन मुलका मानिसहरुको साप्ताहिक आम्दानी अन्य वर्गको भन्दा धेरै देखिएको हो । वर्ल्ड एटललसले सन १९९४ देखि विश्वका विभिन्न भौगोलिक अवस्था, जाती, धर्म तथा लिंगका आधारमा अनुसन्धान गरि प्रतिवेदन सार्वजनिक गर्दै आएको छ । रिपोर्टका अनुसार अमेरिकामा सबैभन्दा धेरै एसियन पूरुषहरुले कमाउंछन भनिएको छ । जस अनुसार अमेरिकामा रहेका एसियन पुरुषले हप्तामा औषतमा एक हजार ८० अमेरिकी डलर आम्दानी गर्छन । उनीहरुको तुलनामा स्वेत अमेरिकी पुरुषहरुको साप्ताहिक आम्दानी औषत आठ सय ९७ अमेरिकी डलर रहेको छ । एसियन मुलका पुरुषहरुको आम्दानी कसरी धेरै भयो भन्ने सवालमा, कामदार मुल्य धेरै हुने राज्यहरुमा एसियन मुलका परुषको बसोबास अत्यधिक भएकोलेपनि आम्दानी धेरै देखिएको अनुमान रिपोर्टमा गरिएको छ । एसियन मुलका पूरुषहरुको आम्दानी धेरै हुनुको अर्को कारणमा शिक्षालाई मानिएको छ । रिपोर्टका अनुसार एसियन मुलका मानिसहरु उच्च शिक्षा हासिल गर्ने र पढे अनुसारको जागिर पाउने तथा तलवपनि धेरै भएकोले तुलनात्मक रुपमा आम्दानी धेरै देखिएको हो । तर साप्ताहिक आम्दानी कम देखिएपनि स्वेत नागरिकहरु अमेरिकामा पहिलेदेखि बस्दै आएकाले पुख्र्यौली सम्पतिका कारण उनीहरु धनी हुन सक्ने रिपोर्टमा बताइएको छ ।

एसियन महिलापनि कम छैनन
अमेरिकामा बस्ने एसियन मुलका महिलाको आम्दानीपनि अन्य महादेशका महिलाको भन्दा धेरै रहेको रिपोर्टले उल्लेख गरेको छ । स्वेत महिलाको तुलनामा एसियन महिलाको आम्दानी एक सय अमेरिकी डलरभन्दा धेरै छ । रिपोर्टका अनुसार एसियन महिलाको साप्ताहिक आम्दानी आठ सय ४१ हुंदा स्वेत महिलाले हप्तामा सात सय ३४ डलर कमाउंछन । एसियन र स्वेत महिलाहरु कार्यालय तथा व्यवस्थापकीय जिम्मेवारीमा रहने तर एसियन महिलाको शैक्षिक स्तर उच्च रहेको कारणपनि आम्दानी उच्च देखिएको अनुमान गरिएको छ ।

एसियन र स्वेत पुरुषपछि अफ्रिकन अमेरिकनको आम्दानी धेरै
अफ्रिकन अमेरिकन पुरुषहरुको आम्दानी स्वेत र एसियन पूरुषपछि सबैभन्दा धेरै देखिएको छ । यद्यपि स्वेत र एसियन महिलाको साप्ताहिक आम्दानीभन्दा कम छ । अफ्रिकन अमेरिकनले हप्तामा ६ सय ८० डलर कमाउछन । उनीहरुको तुलनामा नेटीभ हवाइयन । प्यासिफीक आइल्याण्डर पूरुषले ६ सय ३२ डलर हप्तामा कमाउछन । उनीहरुको तुलनामा नेटिभ अमेरिकन तथा अलास्कन पूरुषले ६ सय २३ र हिस्पानिक पूरुषले ६ सय १६ डलर कमाइ गर्छन । यिनीहरुको आम्दानी कम हुनुमा शैक्षिक स्तरलाई मानिएको छ । अर्को तर्फ हिंशात्मक तथा पारिवारिक विखण्डनका कारण उच्च शिक्षामा पहुंच नभएकाले यिनीहरुको आम्दानी कम देखिएको प्रतिवेदनमा उल्लेख छ ।

अन्य महिलाको आम्दानीपनि पूरुषको भन्दा कम
अमेरिकामा रहेका अन्य समुदाय र वर्णका महिलाहरुको आम्दानीका बारेमा पनि वर्ल्ड एटलसले रिपोर्टमा उल्लेख गरेको छ । अमेरिकामा रहेका स्वेत र एसियन महिलाको तुलनामा अफ्रिकन अमेरिकन लगायत अन्य महिलाको आम्दानी कम छ । उनीहरुको आम्दानीको औषतपनि पूरुषहरुसंग लगभग मिल्दो जुल्दो छ । अफ्रिकन अमेरिकन महिलाले हप्तामा ६ सय ११ डलर कमाउछन । उनीहरुको तुलनामा नेटीभ हवाइयन र प्यासिफीक आइल्याण्डर्स महिलाको आम्दानी ५० डलर भन्दा कम छ । उनीहरुको साप्ताहिक आम्दानी ५ सय ५६ भनिएको छ । तर हिस्पानिक महिलाको आम्दानी नेटिभ अमेरिकन र अलास्कान महिलाको भन्दा केही धेरै देखिएको छ । हिस्पानीकले हप्तामा ५ सय ४८ डलर आम्दानी गर्दा नेटिभ अमेरिकन र अलास्कान महिलाको कमाइ ५ सय २९ डलर रहेको प्रतिवेदनमा उल्लेख गरिएको छ ।

आम्दानीमा विविधता हुनुको कारण शैक्षिक र पारिवारिक मानिएको छ । अर्को तर्फ महिला र पूरुषको आम्दानीमा यति धेरै अन्तर हुनुमा लैंगिक विविधतापनि अर्को कारण हो । यद्यपि अमेरिकामा लैंगिक विभेद गैर कानुनी हो, तर काम गर्ने तथा तलव दिने सवालमा पूरुषहरुलाई नै प्राथमिकतामा राखिने भएकाले आम्दानीमा अन्तर देखिएको हो । कतिपय अवस्थामा बसाई जागिरको प्रकृति र पारिवारिक कारणले पनि आम्दानीमा उतार चढाव देखिएको अनुमानपनि रिपोर्टमा गरिएको छ । विश्वका ७० प्रतिशत मुलुकका नागरिकको आम्दानी अमेरिकीहरुको आम्दानी भन्दा धेरै समान भएको पनि रिपोर्टले दावी गरेको छ । यद्यपि पुंजीवाद र खुल्ला अर्थव्यवस्था भएको अमेरिकामा आम्दानीमा हुने विविधतालाई खासै मुद्वा बनाइएको पाइदैन ।