स्यानफ्रान्सिस्को
लामो प्रयास र अनुरोधपछि वासिंगटन डिसीमा रहेको नेपाली दुतावासले स्यानफ्रान्सिको बे एरियामा यही नोभेम्बर २३-२४ मा कन्सुलर सेवा घुम्ती शिविर संचालन गर्ने भएको छ । नेपालीहरुको बाहुल्यता रहेको बे एरियामा पासपोर्ट लगायत अन्य अत्यावश्यक कागजपत्रको लागि घुम्ती शिविरको माग गत वर्षदेखि नै गरिदैं आएको थियो ।
दूतावासले एकहप्ताको अवधि मात्र राखेर प्रकाशित गरेको सूचनामा यही नोभेम्बर २३- २४ मा एम्रिभिलस्थित होरल सोनेस्थामा विहान ९ बजेदेखि बेलुकी ५ बजेसम्म कन्सुलर घुम्ती शिविर संचालन गरिने उल्लेख गर्दै ई पासपोर्ट लिन र नवीकरणको लागि आवश्यकीय प्रकृया पुरा गर्न अनुरोध गरेको छ ।
सो कन्सुलर सेवा नर्दन क्यालिफोर्नियास्थित नेपालीहरुको साझा संस्था न्यास र एनआरएनए क्यालिफोर्निया च्याप्टरको संयोजनमा हुन लागेको हो ।न्यान्सका अध्यक्ष प्रितेश कार्कीले नेपालीहरुको अधिक बाहुल्यता रहेको क्षेत्रमा कन्सुलर सेवा अवधि हाल छोटो भएपनि केही महिनाभित्रै थप शिविरको माग गरिएको बताए । “हामीले त एकहप्ते शिविरको माग गत वर्षदेखि नै गरिआएका हौं, नेपाली दूतावासदेखि नेपालसम्म हारगुहार गरिरहेकै हौं, केही महिनाभित्रै थप शिविर संचालनको लागि पहल जारी राख्छौं’कार्कीले भने-“अहिलेलाई दुई दिनकै भएपनि केही साथीभाइलाई त सहयोग पुग्छ” । अध्यक्ष कार्कीले न्यान्सको अगुवाइमा नेपाली कन्सुलेट कार्यालय स्यानफ्रान्सिस्कोमा स्थापना गर्न प्रधानमत्रीदेखि परराष्ट्रमन्त्री एवं सबै राजनीतिक पार्टीका नेतासँग अनुरोध र छलफल गरेको स्मरण गर्दै आगमी दिनमा सबैं नेपालीको समस्या समाधान हुने विश्वास व्यक्त गरें ।
एनआरएनए क्यालिफोनिया च्याण्टरका अध्यक्ष हरि ओझाले कन्सुलर सेवा अवधि छोटो भएको तर आफूहरुले केही गर्न नसक्ने बताए । “हामीले गर्ने अनुरोध हो, हारगुहार माग्न कतै बाँकी राखिएको छैन,ओझाले भने-“अब २ दिन भएपनि केहीले त राहत पाउछन् नि” ! स्यानफ्रान्सिस्कोमा हुने शिविरको सेवा अवधिमा सम्वन्धमा दुतावासका एक अभिकारीले भने टिप्पणी गर्न चाहेनन ।
“दुई दिन मात्रै किन? यत्ति छोटो सूचना किन”? पत्रकार उत्तम धमलाले सामाजिक संजालमा लेखेका छन्,”तपाईंको जस्तै प्रश्न मेरो पनि छ। तर फेसबुकमा लेख्ने बाहेक सम्बन्धित निकायलाई प्रश्न गर्ने हिम्मत न तपाईंसंग छ न म संग नै। हुंदै नहुनु भन्दा यत्ति मै भएपनि चित्त बुझाउनु बाहेकको विकल्प हामीसंग छैन”।
प्रतिक्रिया लेख्नुहोस्:-