राजनीतिक स्थिरता कायम हुनुपर्छ : नेता सिंह

काठमाडौँं । काठमाडौं क्षेत्र नम्बर १ बाट प्रतिनिधिसभामा निर्वाचित भएका कांग्रेस नेता प्रकाशमान सिंहले राजनीतिक स्थिरता कायम गर्नतर्फ मुलुक अगाडि बढ्नुपर्ने बताएका छन् ।

उनले शनिबार मतदातासँगको कार्यक्रममा संविधानलाई कार्यान्वयन गर्न दलहरूको तत्परता आवश्यक भएको बताए । ‘दुई संविधानसभाको निर्वाचन गरेर जारी भएको संघीय लोकतान्त्रिक गणतन्त्रको संविधान अहिले कार्यान्वयनको आवश्यकता देखेको छु । कांग्रेसको नेतृत्वमा जारी भएको संविधान कार्यान्वयन गर्ने क्रममा पहिलो प्रतिनिधिसभा सदस्य निर्वाचनमा जनमत नपाएकाले अस्थिरता हुन्छ कि भन्ने लागेको थियो,’ उनले भने, ‘अहिले हामीले संविधानलाई रक्षा गरेर कार्यान्वयन गर्नेतिर जानुपर्छ । दुई संविधानसभाको निर्वाचन गरेर जारी गरेको संविधान कार्यान्वय गर्नुपर्छ । कार्यान्वयन नै हुन लागेको छैन तर यो संविधान नै काम लाग्दैन भन्ने खालका शक्ति आइसकेको छ ।’