काठमाण्डौं, डिसेम्वर १८/ बहुचर्चित सांगीतिक फ्रेन्चाइज शो ‘नेपाल आइडल सिजन-२’ को ग्र्याण्ड फिनाले यही शुक्रवार, डिसेम्वर २१ (पुस ६) मा पुल्चोक इन्जीनियरिंग कलेजको मैदानमा हुँदैछ। सिजन-१ को फिनाले गतसाल कतारको दोहामा हुँदा प्रत्यक्ष प्रशारणमा समस्या आएकाले संसारभरका संगीत पारखीहरुले फिनालेको प्रत्यक्ष प्रशारण हेर्न पाएका थिएनन्। यो पाली नेपाल आइडलका आयोजकहरुले नेपालमा नै फिनाले आयोजना गर्ने निर्णय मात्र गरेका छैनन्, प्रतियोगिताको फर्म्याटमा पनि परिवर्तन गर्दै बाँकी रहेका चारैजना प्रतिस्पर्धीहरुलाई फिनालेमा प्रतिस्पर्धा गराउने निर्णय गरेका छन्।
सुमित पाठक, अस्मिता अधिकारी, बिक्रम बराल र रवि ओद मध्ये एकजना अब नेपाल आइडल हुने निश्चित भएको छ। गत बिहीवार चारैजनाले फिनाले अघिको दमदार प्रस्तुति दिइसकेका छन्। अब दर्शकहरुको भोट जसले धेरै पाउँछ उही नेपाल आइडल हुने पक्का छ। संगीतमा रमाउनेहरु उत्कृष्ट चारबाट जो नेपाल आइडलको बिजेता भएपनि फरक नपर्ने बताउँदैछन् भने शुरुदेखि नै आफूले फलो गरिरहेको गायक/गायिका नेपाल आइडल भएको हेर्न चाहनेहरु पनि उत्तिकै छन्।
“अब बाँकी उत्कृष्ट चारबाट जो आइडल घोषित भएपनि चित्त दुखाउनु नपर्ने ह्युस्टनका बरिष्ठ नेपाली पत्रकार तारा बरालको तर्क छ। तैपनि सुमित पाठक अलि बढी मनपर्छ”, बरालले भने। बराल जस्तै धेरै नेपाली संगीतलाई मन पराउने प्रवासी नेपालीहरु चाहिं कुनै निश्चित प्रतिस्पर्धीलाई मात्र रोज्नु भन्दा संगीतको मज्जा लिनु उपयुक्त हुने बिचार व्यक्त गर्दछन्।
प्रतिक्रिया लेख्नुहोस्:-