डालास-एभरेष्ट लायन्स क्लबको आयोजनामा आगामी आइतवार, अप्रिल ८ मा ‘किड्नी वाक २०१८’ कार्यक्रम हुन गइरहेको जानकारी आयोजकहरुले दिएकाछन्। टेक्ससको अर्भिंग शहरको टिडब्ल्यू रिचर्डसन ग्रोभ पार्कमा दिउँसो १२ देखि ४ बजे सम्म हुने पदयात्राको उद्देश्य मृगौला स्वास्थ्य एवं मृगौला रोग सम्वन्धी जनचेतना जगाउने र बिभिन्न दाताहरुले सहयोग स्वरुप प्रदान गरेको रकम संकलन गरी नेपालमा गरीब/असहाय मृगौला रोगका बिरामीहरुलाई निःशुल्क सेवा दिने रहेको छ। पदयात्रा अभियानबाट संकलित रकमबाट नेपाल स्थित आरोग्य फाउण्डेसनको संयोजनमा डायलेसिस केन्द्रहरु स्थापनामा समेत सहयोग गरिने आयोजक डालास एभरेष्ट लायन्स क्लबका उपाध्यक्ष एवं किड्नी प्रोजेक्टका संयोजक थलराज पन्तले जानकारी गराए।
अर्भिगं शहरका मेयर रिक स्टोफर र उनकी श्रीमतीको प्रमुख आतिथ्यता रहने पदयात्राको नेतृत्व लायन्स क्लबका डिस्ट्रिक्ट गभर्नर हेनरी ह्वाइटले गर्नेछन्। अभियानमा नेपाली-अमेरिकन लगाएत स्थानीय दर्जनौं डाक्टरहरुले ऐक्यवद्धता सहित सहभागि हुने कार्यक्रम रहेको छ।
गरीब र असहाय नेपालीहरुको हितका लागि गर्न लागिएको ‘किड्नी वाक्’मा सक्रिय सहभागिता जनाइदिन र कार्यक्रमको प्रचार-प्रसार गरेर डालास एभरेष्ट लायन्स क्लबको सामाजिक अभियानलाई सहयोग गरिदिन समेत संयोजक पन्तले अपील गरेका छन्।
प्रतिक्रिया लेख्नुहोस्:-