निजगढ, बारा, ३० चैत / महिलालाई स्वच्छ ऊर्जामा पहुँच अभिवृद्धि, ऊर्जा अधिकारको सुनिश्चितता र ऊर्जा दक्षता वृद्धि गर्न सकिएमा वातावरण संरक्षण र जनस्वास्थ्यमा सुधार ल्याउन र मुलुकलाई ऊर्जामा आत्मनिर्भरता गर्न सकिनेमा जोड दिइएको छ ।
वैकल्पिक ऊर्जा प्रवद्र्धन केन्द्रको सहयोगमा नेपाल ऊर्जा फाउण्डेशन तथा ऊर्जा र वातावरणका लागि महिला सञ्जाल नेपाल(ओनी)द्वारा यहाँ आयोजित महिलाका लागि नवीकरणीय ऊर्जा दक्षतासम्बन्धी क्षमता विकास प्रशिक्षण कार्यक्रमका सहभागीले सो कुरामा जोड दिएका हुन् ।
खाना पकाउने, दाउरा संकलन गर्ने, विद्युतीय उपकरणको प्रयोगदेखि विद्युत् महसुल तिर्नेलगायतका कार्यमा महिलाको सहभागिता बढी रहने भएपनि त्यसको सही उपयोग, किफायती तथा सुरक्षित रुपमा प्रयोगसम्बन्धी ज्ञानको अभाव र नीति निर्माण तहमा महिलाको सहभागिता नहुँदा ऊर्जा क्षेत्रमा अनेक समस्या आएको वक्ताहरुको भनाइ थियो ।
प्रशिक्षण कार्यक्रमको उद्घाटन गर्दै निजगढ नगरपालिकाकी उपप्रमुख लीलादेवी लामिछानेले महिला र ऊर्जाबीच अन्योन्याश्रित सम्बन्ध रहे पनि अहिलेसम्म राज्यको ध्यान जान नसकेको बताउँदै नगरपालिकाले यसतर्फ विशेष पहल गर्ने बताउनुभयो ।
प्रशिक्षणमा नेपाल ऊर्जा फाउण्डेशनका निर्देशक डिल्ली घिमिरेले ‘ऊर्जा सुरक्षा र ऊर्जामा नागरिकको अधिकार’, पत्रकार कृष्ण अधिकारीले ‘ऊर्जा दक्षता र नवीकरणीय ऊर्जा’ तथा ओनीकी अध्यक्ष कला तिमिल्सिनाले ‘महिला र ऊर्जाका सवाल’सम्बन्धी कार्यपत्र प्रस्तुत गर्नुभएको थियो ।
प्रशिक्षणमा निजगढ र कोल्हवी नगरपालिकामा ३५ जना महिलाको सहभागिता रहेको थियो ।
सहभागी महिलाले महिला र ऊर्जाको विषयलाई स्थानीयस्तरसम्म विस्तार गर्ने उद्देश्यले निजगढमा दुर्गा कोइराला र कोल्हवीमा कोपिला पौडेलको संयोजकत्वमा ओनीको शाखासमेत गठन गरेका छन् । रासस
प्रतिक्रिया लेख्नुहोस्:-