परिषद्ले एक प्रदेश एक नमूना गाउँ बनाउने

काठमाडौँ, १८ वैशाख / राष्ट्रिय युवा परिषद्ले यस वर्ष ‘एक प्रदेशमा एक नमूना गाउँ’ बनाउने तयारी गरेको छ । सातवटै प्रदेशमा एक–एक नमूना गाउँ बनाउने तयारी गरिएको परिषद्का कार्यकारी उपाध्यक्ष माधव ढुङ्गेलले बताउनुभयो ।

सो कार्यका लागि आगामी आर्थिक वर्षको बजेटमा रकम छुट्याइने तयारी भएको छ । एउटा गाउँका युवालाई एकीकृत गरेर युवाका कार्यक्रम सञ्चालन गर्नका लागि नमूना गाउँ बनाउन थालिएको उहाँले बताउनुभयो ।

“सरकारी, गैरसरकारी निजी क्षेत्रका युवासंग सम्बन्धित कार्यक्रमलाई एकीकृत गरेर युवाको क्षमताअनुसार व्यावसायिक बनाउनका लागि कार्यक्रम गर्न थालिएको हो”, उपाध्यक्ष ढुङ्गेलले भन्नुभयो, “गाउँलाई युवामैत्री बनाइने छ ।”

परिषद्ले स्थानीय तह र जिल्ला युवा समितिलाई नमूना गाउँ छनोट गरेर पठाउन निर्देशन दिइएको र जेठसम्म गाउँको मापदण्ड, विधि तयार गरी छनोट गरिसक्ने योजनामा रहेको उपाध्यक्ष ढुंगेलले बताउनुभयो । दोस्रो चरणमा नगरपालिकाका पिछडिएका गाउँलाई समेट्ने परिषद्को तयारी छ । रासस