अमेरिका, अगष्ट ७, २०१८
संयुक्त राज्य अमेरिकाले इरान माथि फेरि आर्थिक प्रतिबन्ध लगाएको छ। राष्ट्रपति ट्रम्पले जारी गरेका नयाँ कार्यकारी आदेशानुसार आज मंगलबार बिहान १ बजेबाट इरान माथि लगाएको प्रतिबन्ध लागू भैसकेको छ। राष्ट्रपति ओवामाको कार्यकालमा अमेरिका लगाएतका सुरक्षा परिषदका अन्य शक्ति राष्ट्रहरुले हस्ताक्षर गरेर २०१५ मा इरान सम्झौता भएको थियो। सो सम्झौता अनुसार इरान माथि लगाइएका आर्थिक नाकाबन्दी हटाइएको थियो भने इरानले आफ्नो आणविक कार्यक्रम निस्तेज पार्ने सहमति भएको थियो। गत मे मा राष्ट्रपति ट्रम्पले सो सम्झौताबाट पछि हटाने घोषणा गरेपछि सम्झौता अलपत्र पर्ने स्थिति पैदा भएको थियो। आगामी नोभेम्वरबाट इरानको तेल निर्यातमा समेत असर पर्ने गरी अमेरिकी नाकाबन्दी जारी भएको छ। आज बिहान ट्वीटर मार्फत एक सन्देश दिंदै राष्ट्रपति ट्रम्पले इरान माथि अहिलेसम्मकै सबभन्दा कडा प्रतिबन्ध लगाइएकोले इरानसंग व्यापार गर्नेहरुले अमेरिकासंग व्यापार गर्न नसक्ने बताएका छन्। उनको यो घोषणाले इरानसंग व्यापारको निरन्तरता चाहने कतिपय अमेरिकी व्यापार साझेदारहरुलाई निकै असजिलो हुने निश्चित छ। अब इरानले अमेरिकी डलर खरीद गर्न पाउने छैन जसले गर्दा उसलाई अन्तराष्ट्रिय व्यापार गर्न ज्यादै मुस्किल हुने पक्का छ।
अमेरिकी नाकाबन्दीको बिपक्षमा रहेको यूरोपियन यूनियन, रसिया तथा चीनले ताजा अमेरिकी प्रतिबन्धको बिरोध गरेकाछन्। यसैबीच यूरोपियन यूनियनले इरानसंगको बैधानिक व्यापारको पक्षमा उभिने बताएको छ। नयाँ प्रतिबन्ध विश्व शान्तिका पक्षमा भएको बताएका अमेरिकी राष्ट्रपति ट्रम्प ओवामा प्रशासनको सबै कामहरुलाई उल्ट्याउने अभियानमा निरन्तर छन् र त्यसैको अर्को एउटा पटाक्षेप हो नयाँ अमेरिकी घोषणा।
इरानी राष्ट्रपति हसन रौहानीले अमेरिकी नाकाबन्दीको बिरोध गरेकाछन् र भनेका छन्- “अमेरिका इरानसंग मनोवैज्ञानिक युद्ध चाहन्छ र उसले इरानी जनताहरुलाई बिभाजन गर्न खोज्दै छ।”
यी सबै तनावहरुकाबीच अन्तराष्ट्रिय समुदायलाई वार्ता र समझदारीबाट अघि बढ्न अमेरिका र इरान दुबैलाई अनुरोध गरिरहेका छन् ।
तस्वीर: रोयटर्स
प्रतिक्रिया लेख्नुहोस्:-