एनआरएनए अमेरिकाको फिजिकल मिटिङ न्यूयोर्कमा

 सानफ्रानसिस्को १३ डिसेम्बर/
आकांक्षिहरु चुनावी दौड धूपमा होमिएका कारण अर्थपूर्ण रूपमा हेरिएको एनआरएनए अमेरिकाको फिजिकल मिटिङ १२ जनवरीमा न्युयोर्कमा हुने भएको छ । कार्यसमितिका पदाधिकारी र सदस्यहरूको भौतिक उपस्थितिमा (प्रत्यक्ष भेटेर) हुने बैठकले नयाँ सदस्यता वितरण, पुराना सदस्यहरूको नवीकरण, निर्वाचनको तयारी माथि छलफल र अहिलेसम्म भएका कामहरूको समीक्षा गर्ने छ । एनआरएनए अमेरिकाका महासचिव बी आर लामाले दूरबिन नेपालसँग कुरा गर्दै भने “विस्कनसिन, न्यु ह्यामसार र न्यु योर्क च्याप्टरले फिजिकल मिटिङ गर्न प्रस्ताव गरेका थिए । कार्यसमितिले न्यूयोर्कको प्रस्तावलाई अनुमोदन ग¥यो ।”
सदस्य संख्याका हिसाबले न्यु योर्क अमेरिकाको दोस्रो ठुलो च्याप्टर हो । वर्षमा कम्तीमा तीन पटक फिजिकल मिटिङ गर्ने पूर्व निर्धारित कार्यक्रम अनुसार नै यो न्यूयोक बैठकको गृहकार्य भएको हो । एनआरएनए अमेरिकाका प्रवक्ता विनोदबाबु तिवारीले दूरबिन नेपाललाई भने “बैठकका लागि आवश्यक सबै काम न्यु योर्क च्याप्टरले गर्ने छ । मेम्वरसिप ड्राइभ र निर्वाचनको पूर्वसन्ध्यामा हुन लागेको बैठकका एजेन्डा पनि यसैको पेरिफेरीमा हुन सक्ने छन् ।”
कार्यसमिति सदस्य गोपेन्द्र भट्टराई संस्था भित्रका सानातिना विवाद र कलहमा नअल्झिकन संस्थाका योजना र कामहरूलाई सफल बनाउन फिजिकल मिटिङले मार्ग निर्देशन गर्नेमा विश्वस्त छन् । भट्टराईले भने “हामीले यो कार्यकालमा थुप्रै कामहरूको सुरुवात गरेका छौ । फिजिकल मिटिङमा आमनेसामने बसेर समीक्षा गर्छौ । मेम्वरसिप ड्राइभमा फोकस हुनेछौँ । यस अघि ह्यूस्टन र सानफ्रानसिस्कोमा एनआरएन अमेरिकाको फिजिकल मिटिङ भएको थियो ।”