अमेरिका ।
एनआरएनए अमेरिकाले आसन्न निर्वाचनका लागि आज अर्थात् मङ्गलवारबाट मनोनयन दर्ता खुला गरेको छ । अप्रिल १९ तारिख मध्यरात सम्म मनोनयन दर्ता गर्न मिल्ने छ । उम्मेदवारलाई आफ्नो मनोनयन फिर्ताको समय दिइए पनि मनोनयन दाखिला गर्दा बुझाएको रकम भने फिर्ता नहुने भएको छ । एनआरएन अमेरिका निर्वाचन आयोगले इमेल मार्फत मनोनयन शुल्क फिर्ता नहुने जनाएको हो ।
उम्मेदवारी दर्ता फर्मसँगै अध्यक्षका दाबेदारहरूले २ हजार डलर, वरिष्ठ उपाध्यक्ष र महासचिवका निवेदकले १५ सय डलर क्षेत्रीय उपाध्यक्षले १३ सय डलर, सचिव र कोषाध्यक्षले एक हजार डलर, सह कोषाध्यक्षले ८ सय डलर र बाकी पदहरूमा ७ सय डलर बुझाउनु अनिवार्य छ ।
च्याप्टर अध्यक्षका आवेदकले ५सय, उपाध्यक्ष र महासचिवले ३ सय बुझाउनु पर्ने छ । एनआरएनए एनसीसी अमेरिकाको माताहातमा २० स्टेट च्याप्टरहरू रहेका छन् । केन्द्र र च्याप्टरमा गरी करिब ३ सय भन्दा बढिले उम्मेदवारी दाखिला गर्न सक्ने अनुमान गरिएको छ ।
मुद्दा मामिला र एनआरएनए आइसीसीको भवन निर्माणमा धेरै रकम खर्च गरेर आर्थिक हिसाबले कमजोर भएको एनआरएनए अमेरिकालाई मनोनयन शुल्कबाट सङ्कलन हुने रकमले आर्थिक रूपमा केही मजबुत बनाउने छ ।
प्रतिक्रिया लेख्नुहोस्:-