एनआरएनए अमेरिकाको साधारण सभामा आइसीसीको चिन्ता र चासो    

दूरबिन संबाददाता ।

अमेरिका ।शुक्रबार साँझ वेभनरबाट एनआरएनए अमेरिकाको साधारण सभा शुरु भएको छ । उद्घाटन  समारोहमा गैर आवासीय नेपाली संघ अन्तराष्ट्रिय समन्वय परिषद आइसीसीका पदाधिकारीहरूले एनआरएनए अमेरिकाका कतिपय पक्षमा चासो र चिन्ता समेत जाहेर गरेका छन् ।

एनआरएनए अन्तराष्ट्रिय समन्वय परिषद्का अध्यक्ष कुमार पन्तले एनसीसीका सदस्यहरूको विवरण केन्द्रको नियन्त्रण र निगरानीमा राखेर निर्वाचन गराउने चाहनालाई मुखरित  गरे । पन्तले भने  “स्मार्ट एनआरएनएमा सवै आइसीसीहरुलाई आवद्ध गराएर जाने हामीले निर्णय गरिसकेका छौ । अधिवेशन अगाडि नै सबै सदस्यको बिबरण उपलब्ध गराउने प्रकृयामा कुनै विधि विधान सुधार गर्नु परे अहिले नै गर्नुस् । त्यसलाई फलो नगर्ने एनसीसीका डेगिगेटसलाई सहभागि गराउन सकिदैन ।”    

अध्यक्ष पन्तले ज्ञान सम्मेलनको सोच र प्रस्ताव अघिल्लो कार्य समितिमा  आफैले टेबल गरेको र अमेरिकाबाटै  त्यसले सही दिसा पाएको बताए ।  ज्ञान सीप र प्रविधिलाई नेपालमा लान एनअरएनए अमेरिकाले आयोजना गरेका ज्ञान सम्मेलनले आफूलाई उत्साहित बनाएको उल्लेख गरे ।  कोभिड १९ बाट प्रभावित प्रवासी नेपालीलाई देश भित्र लान आइसीसीले गरेका कामको चर्चा गरे । पन्तका अनुसार एनआरएनए कै पहलमा १२ हजार भन्दा बढि नेपाली नेपाल फर्किसकेका छन् । कोरोना भाइरसका कारण विभिन्न देशमा ज्यान गुमाएका एक सय भन्दा बढि नेपाली शव समेत नेपाल फर्काइएको जानकारी गराए ।

त्यस्तै उपाध्यक्ष बद्री के सीले एनआरएनएलाई सदस्यको शुल्कबाट चल्ने अवस्थाबाट बाहिर निकाल्न भएका प्रयासको चर्चा गरे । केसीका अनुसार आइसीसीले आईएलओबाट ४ लाख डलर ग्रान्ट पाएको छ । यो रकम रोजगारका लागि बाहिर गएकालाई उद्धार र सहयोगमा प्रयोग गरिने छ ।  आफूभन्दा अघिल्ला वक्ता डाक्टर केशव पौडेल आइसीसीका काम र योजना समस्यामा परेका भन्दै सही योजना बनाएर कार्यन्वयन गर्न दिएको सुझावमा उपाध्यक्ष केसीले सहमति जनाए । के सीले भने  “डाक्टर पौडेलले उठाउनु भएको कुरामा सहमत छु । लाप्राक र शंखमुल पार्क बनाउदा लक्ष भन्दा बढि खर्च भयो । त्यही कारण आगामी दिनमा योजना र लागत मूल्य सही ढंगले बनाउने काम हुँदै छ ।  केसीले एनआरएनए अमेरिकालाई बारम्वार मुद्धा झेल्ने अवस्थाको अन्तका लागि पहल गर्न सुझाव पनि दिए ।” 

यथार्थ चित्रण गर्दै गर्भिलो मन्तव्य दिएका महासचिव हेमराज शर्माले एनआरएनएमा  बाहिर बस्ने करिब २ प्रतिशत नेपालीले मात्र आवद्ध भएको तथ्य अगाडि सारे । उनले सदस्य संख्या थपिदै जानु पर्नेमा कम हुनुका पछाडिका विविध पक्षको समालोचना गरेका थिए । चुनाव केन्द्रित सदस्यता, प्रवासमा रहेका राजनीति संघ संगठनको दवदवा, गुट, फुट,एनआरएनएको कार्यसैली र विधिबिधान भित्रका जडि कुरालाई उनले खुलस्त गरेका थिए ।  ‘गाजेर राख्ने भन्दा पनि कसरी सुधार गर्ने तर्फ छलफल गरौं । स्मार्ट एनआरएनए र आफ्नै जगमा उभिन सक्ने दरिलो एनआरएन बनाउन पहल गरौं’ भन्ने महासचिव शर्माको आग्रह थियो । 

पूर्व उपाध्यक्ष कुल आचार्यले आपसी मतमतान्तर भन्दा माथि उठेर नेपाल र नेपालीको हितमा एनआरएनएलाई जोडेर अगाडि जान ठोस काम गर्नु पर्ने बताए । आचार्यले नेपालमा एक एनआरएन एक रोजगारको कार्यक्रम गर्न सकेमा नेपालको गरिबि निवारण र बेरोजगारी समस्या हल गर्न सहयोग पुग्ने भन्दै त्यसमा छलफल गर्न प्रस्ताव समेत गरेका छन् । 

एनआरएनए अमेरिकाका अध्यक्ष सुनिल साहले कोभिड १९को महामारीले निम्त्याएको बिषम परिस्थितिमा संस्थाले गरिरहेका कामको फेहरिस्त प्रस्तुत गरेका थिए । साहले संस्थालाई गतिशिल बनाउन अप्ठयारो समयमा पनि साधारण सभा र ज्ञान सम्मेलन गर्न लागिएको उल्लेख गरे । साहले गैर नाफामुलक सामाजिक संस्थामा चुनाव हार्ने र संस्थालाई ल सुट गर्न जानेलाई काधमा राखेर संस्थालाई कमजोर बनाउन नसकिने बताए ।  

साधारण सभाका प्रमुख अतिथि परराष्ट्रमन्त्री प्रदिप ज्ञावलीले अमेरिकामा आर्जन गरेको पुजी, अनुभव ज्ञान र सिपलाई गैर आवासीय नेपालीहरुले नेपालको हितमा जोड्न सकेमा आधुनिकताको मार्गमा नेपाललाई हिडाउन सहयोग पुग्ने विस्वास ब्यक्त गरे । कोभिड १९का कारण विश्वभर विद्यमान संरचना र प्रणालीमा सुधार गरेर जानु पर्ने चुनौति थपिएको  छ ।  नेपाललाई महामारीले निम्त्याएको आर्थिक संकटबाट बाहिर निकाल्न गैर आवासीय नेपालीलाई नेपालको विकाससँग जोडिन मन्त्री ज्ञावलीले आग्रह समेत गरे । 

समारोहमा विशेष अतिथिको रुपमा बोल्दै कांग्रेस नेता डाक्टर शेखर कोइरालाले शिक्षा, स्वास्थ्य ब्यापार ब्यबसाय, विज्ञान र प्रविधिमा हासिल गरेको ज्ञान भइरकेका अनुसन्धान, र अनुभवलाई जोड्न सकेमा प्रवासमा रहेका नेपालीबाट नेपालको बिकासलाई टेवा पुग्ने बताए । अतिथि बक्ताको रुपमा मन्तब्य राख्दै पूर्व मन्त्री प्रकाश शरण महतले गैर आवासीय नेपाली नागरिकता प्रदान गर्ने कानुनी प्रक्रियालाई सरकारले प्राथमिकतामा नराखेका कारण लम्बिदै गएको बताए । 

अमेरिकाका लागि नेपाली राजदुत डाक्टर अर्जुन कार्की अमेरिकामा वस्ने नेपाली समुदायमा हार्दिकता, आपसी सद्भाव र सहकार्य कम भएको दुखेसो पोखे । एक अर्काको आलोचना र टिकाटिपणीमा धेरै समय खर्चिएर नकारात्मक भाव विकास गरेको उनको गुनासो थियो । राजदुत कार्कीले लाईभ वेभनरको आफ्नो ब्याकग्राउन्ड फ्रेममा अमेरिकाको मात्र झण्डा देखिने गरी राखेर नेपाली झण्डा लुकाएको भन्दै सामाजिक सन्जालमा कतिपयले राजदुत कार्कीको आलोचना गरेका छन् ।