न्यु योर्कमा आदिवासी जनजाति विषयका  ७ वटा चलचित्र प्रदर्शन गरिने

न्यु योर्क । तेस्रो नेपाल आदिवासी चलचित्र महोत्सव तथा निफ अवार्ड २०२१ मा आदिवासी जनजातिका विषयमा बनाइएका ७ वटा चलचित्र प्रदर्शन गरिने भएको छ । २७ औँ विश्व आदिवासी दिवसको अवसरमा नेपाल आदिवासी जनजाति महासङ्घ (फिप्ना) अमेरिकाले आयोजना गरेको महोत्सवमा सात वटा चलचित्र प्रदर्शन गरिने महासङ्घका महासचिव नरेन्द्र थापाले जानकारी दिए । महोत्सव यही अगष्ट २१ र २२ तारिखका दिन न्यु योर्कको ज्याक्सन हाइटमा अवस्थित गुल्सन ट्यारेशमा आयोजना हुँदै छ ।

कसैलाई पछाडि नछाडौँ : आदिवासी जनजाति र नयाँ सामाजिक सम्झौताका लागि आव्हान Living No one behind Indigenous Peoples and the call for a New Social contract Living No one behind Indigenous Peoples and the call for a New Social contract नारासहित विश्वभरि विभिन्न कार्यक्रम गरी विश्व आदिवासी जनजाति दिवस मनाइरहेका छन् । विभिन्न जनजाति समुदायको मातृभाषामा निर्माण गरिएका १५ वटा चलचित्र मध्येबाट छनौटमा परेका ७ वटा चलचित्र प्रदर्शन गर्न लागिएको महोत्सव संयोजक तथा महासङ्घका महासचिव थापाले बताए ।

महोत्सवमा गुरुङ जातिको मि न्होर्वै ट, तामाङ जातिको प्रङ्ना, मगर जातिको ट्याङचालक, लिम्बु जातिको के, राई जातिको सायाबुङ, नेवार जाति जा मनःगुभाजु, ह्योल्मो जातिको मेतोक प्रदर्शन गरिने भएको छ । फिप्नाका अध्यक्ष लोक चेम्जोङले नेपालका आदिवासी चलचित्र मार्फत जनजातिको भाषा, भेषभुषा, संस्कृतिको संरक्षण र संवर्द्धन गर्ने उद्देश्य रहेको बताए । अध्यक्ष चेम्जोङले महोत्सवमा चलचित्र सहभागिता गराउने सम्पूर्ण चलचित्रकर्मीहरूलाई धन्यवाद व्यक्त गर्दै अन्तिम छनौटमा परेका चलचित्रहरूलाई बधाई सहित शुभकामना व्यक्त गरेका छन् ।

चलचित्र महोत्सवले आदिवासी जनजाति चलचित्रलाई अन्तर्राष्ट्रियकरण गर्न सघाउ पुर्‍याउने आयोजकको अपेक्षा छ । नेपाल आदिवासी चलचित्र महोत्सव निफको यो तेस्रो संस्करण हो । शनिवार र आइतबार दुई दिनसम्म चल्ने महोत्सवमा विभिन्न १० वटा विधामा अवार्ड वितरण गरिने आयोजकले जनाएको छ । छनौटमा परेका ७ चलचित्र नेपाल आदिवासी जनजाति चलचित्र महासङ्घ नेपालले सङ्कलन गरी पठाइएको हो । चलचित्र छनौट समितिले उक्त सात चलचित्र छनौट गरेको हो । चलचित्र छनौटको लागि सम्बन्धित भाषाको जातीय संस्थाहरुलाई जिम्मेवारी दिइएको थियो । चलचित्र छनौटको लागि सम्बन्धित भाषाको जातीय संस्थाहरूलाई जिम्मेवारी दिइएको थियो । महोत्सवमा लोकप्रिय गायकहरू जगदीश समाल मंगोलियन हार्टका राजु लामाले गीत प्रस्तुत गर्दैछन् । कार्यक्रम मिस नेपाल सदिक्षा श्रेष्ठले सञ्चालन गर्दैछन्  ।