काठमांडौ । जघन्य अपराध र अनियमिततालाई ढाकछोप गरेर एकपक्षीय रूपमा निर्वाचन गराउन अध्यक्ष कुमार पन्त र पूर्व अध्यक्ष जिबा लामिछानेले चर्को दबाब दिएपछि गैर आवासीय नेपाली सङ्घका प्रमुख निर्वाचन आयुक्त लीलामणि पौडेलले राजीनामा दिएका छन् । निष्पक्ष भएर र सबैको सहभागितामा निर्वाचन गराउने परिवेश निर्माण भएमा मात्र आफूले निर्वाचन गराउने पन्त र लामिछानेलाई पौडेलले बताएको स्रोतको भनाइछ ।
प्रमुख निर्वाचन आयुक्त पौडेलले संस्थाको पद र जिम्मेवारीको दुरुपयोग गरी जापानको एनसीसी इलेक्सनमा गरिए जस्तै एमआइएस सिस्टमबाट आइसीसी डेलिगेटसको इमेल र विवरण फेरबदल गरेर अरूको नाममा आफैले भोट हालेर अर्को पक्षले भोट हाल्ने नसक्ने बनाएर आफै निर्वाचित हुने वा गराइने परिवेश छैन भन्ने तथ्यगत प्रमाण आफूलाई चाहिएको बताएका थिए । अध्यक्ष कुमार पन्तले त्यसमा ठोस जवाफ दिन सकेनन् ।
आइसीसीकै संलग्नतामा भएको छानबिनले जापानमा निर्वाचनको मुखमा १७ सय सदस्यको इमेल परिवर्तन गरेर नेपाल र भारतबाट मतदान गरिएको प्रमाणित गरेको थियो । त्यस्तो जघन्य अपराध प्रमाणित हुँदा पनि आइसीसीले जापानको निर्वाचन रद्द गरेको छैन । सदस्यको डाटामा एक्सेस भएका आइसीसीमा एमआइएस सिस्टम हेर्ने र सचिवालय हेर्नेलाई यो अपराधमा संलग्न छन् वा छैनन् भनी निलम्बन गरी अनुसन्धानका लागि प्रहरीमा बुझाउनु पर्ने एनआरएनए जापानका पूर्व पदाधिकारीहरूको माग छ ।
एनआरएनए चिलिमा पनि त्यस्तै गरी निर्वाचन प्रभावित गरिएको थियो । निर्वाचनमा सहभागी बहुमत सदस्यले लिखित रूपमा एमआइएस सिस्टमको दुरुपयोग गरी निर्वाचन परिणाम उल्टो बनाएको निवेदन दिए पनि आइसीसीले सुनुवाइ गरेन । बेलायतमा पनि निर्वाचन परिणाम उल्ट्याउन ४ दिन सम्म कसरत गरेका थिए । तर निर्वाचन गराउने भेण्डर उनीहरूको प्रस्ताव र प्रलोभनमा नपरेपछि प्रयास असफल भएको थियो ।
आइसीसीको निर्वाचनको नाममा नेतृत्व त्यसरी नै हत्याउने प्रयासमा कुमार पन्त र जीवा लामिछाने कम्मर कसेर लागेको धेरैको बुझाइ छ । डेलिगेटस चयनमा विधानको अपव्याख्या र एमआइएस सिस्टमको दुरुपयोगको विषयमा विश्वभरका एनसीसीहरुले आवाज उठाउँदा र निवेदन दिँदा पनि यो विषयमा पूर्व अध्यक्ष जिबा लामिछाने र उपेन्द्र महतो एक शब्द बोलेका छैनन् । छानबिन गराएर निष्पक्ष निर्वाचन गराउन पत्राचार गर्ने सरकारको कदको विरुद्धमा भने वकिल लिएर मन्त्री मन्त्रालय र कर्मचारीलाई प्रभावित गर्न पूर्व अध्यक्ष लामिछाने र महतो दौडधुप गरे । सरकार विरुद्धको मुद्दामा सेटिङ मिलाउन पनि जिबा र उपेन्द्र लागि परेको अर्को पक्षको भनाइ छ ।
कतिपय आइसीसीका पदाधिकारी र सदस्यहरूले नै अध्यक्ष पन्त र केही पूर्व अध्यक्षहरु एनआरएनका नाममा गरिरहेका धन्दा र व्यापारलाई प्रभावित होलाकी भनेर तल्लो स्तरमा झरेर अपराधीलाई संरक्षण गर्दै संस्था कब्जा गर्न अग्रसर भएको सार्वजनिक रूपमा नै बताउन थालेका छन् ।
आइसीसीको विधान व्याख्या समितिमा बसेर आइसीसी डेलिगेटस चयनको विषयमा विधानको अपव्याख्या गरिरहेको आरोप खेपिरहेका भूषण घिमिरे निर्वाचन समितिका सदस्यसचिव छन् । निष्पक्ष निर्वाचनको माग गर्ने प्रमुख निर्वाचन आयुक्त पौडेललाई राजीनामा गर्न बाध्य परेर भूषण घिमिरेबाट एकपक्षीय निर्वाचन गराउन पन्त र लामिछाने लागि परेको कतिपयको आरोप छ ।
प्रतिक्रिया लेख्नुहोस्:-