काठमाडौं । काठमाडौं उपत्यकामा आजदेखि ‘नो हर्न’ अभियानको कार्यान्वयन प्रभावकारी रूपमा लागू गर्न थालिएको छ ।
नो हर्न लागु भए पनि कोरोनालगायत कारणले अभियान सुस्ताएको थियो । आज एक कार्यक्रम गरी नो हर्न अभियानलाई प्रभावकारी रूपमा सुरु गरिएको जानकारी गराइएको छ ।
काठमाडौं उपत्यका ट्राफिक प्रहरी कार्यालयका प्रवक्ता एसएसपी राजेन्द्र भट्टले हर्न बजाएको पाइए कारबाहीको दायरामा ल्याइने बताए । उनका अनुसार शनिबार (हिजो) मात्र हर्न बजाउने ५४ जनालाई कारबाही गरिएको छ ।
हर्न बजाएको पाइए एकपटकमा ५०० रुपैयाँ जरिवाना हुने एसएसपी भट्ट बताउँछन् । उनले भने, “विगतमा हर्न बजाउन निकै कम भइसकेको थियो । अहिले फेरि बढेको देखिन्छ । ज्रेबा क्रसिङमै हर्न बजाइदिने, रेड लाइट बल्दा पनि हर्न बजाइदिने, ओभरटेक गर्दा हर्न बजाउने प्रवृत्ति बढी देखियो । त्यसैले यसलाई निरुत्साहित पार्न कडाइका साथ हामी परिचालित हुन्छौँ ।”
उनले विशेष अवस्थामा हर्न बजाउन पाइने भए पनि मन लागेको बेला हर्न बजाउँदा कारबाही हुने बताए ।
प्रतिक्रिया लेख्नुहोस्:-