सानफ्रानसिस्को २७ मार्च
क्यालिफोर्नियामा बसोबास गर्दै आएका नेपालीहरूले सञ्चालन गरेका सङ्घ संस्थाहरू मध्येको सक्रिय सन्नी सगरमाथा समाजमा दुई वर्षीय कार्यकालका लागि प्रमीला थापाको अध्यक्षतामा नयाँ कार्यसमिति चयन भएको छ । थापा यस अगाडि वरिष्ठ उपाध्यक्ष थिइन् ।
समाजको आइतबार सम्पन्न १३ औँ साधारण सभाले थापाको अध्यक्षतामा सर्वसम्मतिमा नयाँ कार्यसमिति चयन गरेको हो ।
प्रथम उपाध्यक्षमा चेतबहादुर राउत दुतिय उपाध्यक्षमा विन्दु सापकोटा, महासचिवमा अनुप अधिकारी, सचिवमा मदन पाण्डे , कोषाध्यक्षमा राजु कार्की
सदस्यहरूमा नन्दराज पराजुली, मनोज ओली, नवराज तिवारी, सोहन लुइँटेल, लक्ष्मी बासकोटा लगायत रहेका छन् ।
विष्णु कार्कीको संयोजकत्वमा पुरुषोत्तम अधिकारी र अमर लामिछाने रहेको सनी सगरमाथा समाजको तीन सदसिय निर्वाचन समितिले निर्वाचित पदाधिकारी र सदस्यहरूलाई पद तथा गोपनीयताको शपथ गराउनका साथै प्रमाण पत्र हस्तान्तरण गर्यो ।
कोरोना महामारीका कारण समयमा नयाँ कार्यसमितिका लागि निर्वाचन गर्न नसक्दा सन्तोष गिरीको नेतृत्वमा रहेको कार्यसमितिले चार वर्ष संस्थालाई हाँक्यो ।
सन् २००६ देखि सानफ्रानसिस्को बे एरियामा सक्रिय रहेको सन्नी सगरमाथा समाज सन् २००९बाट विधिवत रूपमा दर्ता भएर सञ्चालनमा आएको हो । कार्यक्रमलाई सम्बोधन गर्दै संस्थापक अध्यक्ष ईश्वर सापकोटाले सन्नी भेल, माउन्टेनभ्यू, सान्ताक्लारा वरपर बस्ने नेपालीहरूको पहलमा संस्था स्थापनाका लागि गरिएका प्रयासहरूको स्मरण सुनाए । पूर्व अध्यक्ष, हरिहर दाहाल, गङ्गा केसी कार्यक्रममा सहभागी भएका थिए । महामारीको बिचमा पनि नेपाली समुदायलाई जोड्न संस्थाबाट भए गरेका कामको निवर्तमान अध्यक्ष सन्तोष गिरीले चर्चा गरे ।
सन्नी सगरमाथा समाजले नेपाली नयाँ वर्षको अवसरमा शुभकामना आदान प्रदान र वनभोजको आयोजना गर्दै आएको छ । यो संस्थाको सबै भन्दा ठुलो र खर्चिलो कार्यक्रम हो । यो कार्यक्रममा सानफ्रानसिस्को बे एरियामा रहेका दुई हजार भन्दा बढी नेपालीहरूको सहभागिता हुने गरेको छ । त्यस्तै नेपाली महिलाहरूको महत्त्वपूर्ण चाड तीज पनि समाजको अर्को प्रमुख कार्यक्रम हो । समाजले बे ऐरियमा रहेका नेपालीहरूलाई आपद विपद् सहयोग गर्दै आएको छ । सन्नी सगरमाथा समाजले बे एरियामा रहेका नेपालीहरूलाई मर्दा–पर्दा,पर्व–उत्सव, दुख–शुखमा छहारी हो संस्था भन्ने अनुभूति गराएको छ ।
प्रतिक्रिया लेख्नुहोस्:-